Дзяржаўны дэпартамент ЗША абвясціў лаўрэатаў Міжнароднай прэміі «Жанчыны мужнасці» 2024 года. Цырымонію ўзнагароджання 4 сакавіка ў Белым доме правядуць дзяржаўны сакратар ЗША Энтані Блінкен і першая лэдзі краіны Джыл Байдэн.
Сярод лаўрэатаў сёлета – прадстаўніца Аб’яднанага пераходнага кабінету ў пытаннях сацыяльнай палітыкі Вольга Гарбунова.
«Вольга Гарбунова – беларуская праваабаронца, якая прысвяціла сваё жыццё абароне правоў жанчын, дзяцей, ЛГБТКI+ і іншых маргінальных груп у Беларусі. Пасля фальсіфікацыі выбараў 2020 года ў Беларусі спадарыня Гарбунова была зняволеная рэжымам Лукашэнкі пасля арганізацыі жаночых маршаў і ў вязніцы падверглася псіхалагічным катаванням з боку ўладаў і пагрозам смерці за дапамогу жанчынам, якія зазналі гвалт. Пасля вызвалення спадарыня Гарбунова збегла з Беларусі, баючыся працягу рэпрэсіяў, і ў выгнанні ў Літве далучылася да кабінета Святланы Ціханоўскай, лідаркі беларускага дэмакратычнага руху», – гаворыцца ў паведамленні Дзярждэпу.
Беларускае Радыё Рацыя
Фота: “Новы час”
