Адзін з вызваленых і дэпартаваных з Беларусі 14-ці палітвязняў — грамадзянін Латвіі Дзмітрыc Міхайлаўc. За час зняволення ён схуднеў на 26 кілаграмаў і цалкам пасівеў, піша латвійскае выданне Lsm.lv.
21 чэрвеня, калі яго пасадзілі ў машыну з мяшком на галаве і ў кайданках, па словах Міхайлаўса, ён думаў, што яго вязуць на расстрэл. Аднак лукашэнкаўскія ўлады даставілі групу вязняў да мяжы, дзе іх чакаў аўтобус.
Міхайлаўса арыштавалі за каментаванне відэа з пратэстаў 2020 года ў закрытай групе прадпрымальнікаў у «Signal» праз паўтара года пасля тых каментароў. Тое, што ён грамадзянін іншай краіны і каментаваў за межамі Беларусі, суд нават не ўлічыў. Яму прысудзілі чатыры гады калоніі.
Дзмітрыс Міхайлаўс валодаў некалькімі крамамі ў Менску. Ён прызнаўся, што ў яго былі ружовыя акуляры, бо ў яго ўсё было добра да тых яго каментароў.
«Усе грамадзяне Латвіі, якія лічаць, што могуць туды ехаць – добра, едзьце. Але ведайце, калі нешта выпадкова здарыцца… калі ў вас у тэлефоне ёсць перапіска са сваяком у Латвіі аб вышэйшай уладзе, нават проста прапанова аб тым, што ім не трэба здымаць санкцыі… – шэсць гадоў турмы», – папярэдзіў Міхайлаўс.
