Заснавальнік фонду салідарнасці BY_help Аляксей Лявончык склаў заявы аб знікненні Анжалікі Мельнікавай ў Metropolitan Police і NCA — нацыянальную крымінальную агенцыю Вялікабрытаніі.
Далей Лявончык плануе гаварыць з памежнай службай у аэрапортах Лутан і Хітроу. Гэта два аэрапорты, куды Анжаліка магла прыляцець з аэрапорту Шапэна ў Варшаве.
У СМІ з’явілася інфармацыя, што Мельнікава самастойна вылецела з Польшчы ў Вялікабрытанію, «пасля чаго яе след згубіўся». СМІ таксама адзначылі, што невядома, дзе яе дочкі (6 і 12 гадоў).
Мельнікава была абраная старшынёю Каардынацыйнай рады трэцяга склікання 11 ліпеня 2024 году ад блоку «Каманда Латушкі і Рух „За Свабоду“». Яна заставалася на сувязі прынамсі да 21 сакавіка.
