У бліжэйшую пятніцу ў Бельску-Паляшскім стартуе «Бардаўская восень». Фестываль пройдзе ў 30-ы раз і стане мультыдысцыплінарным: акром аўтарскай музыкі, у праграме кінапаказ, дыскусія, лекцыя і паэтычны стэндап.
На што асабліва варта звярнуць увагу, распавёў суарганізатар фесту, старшыня фонду «Тутака» Павел Станкевіч:
– Мне цікава, які будзе водгук. Гэта будзе лекцыя Гражыны Харытанюк пра Дзяды. Пра абрад, але таксама пра Дзяды ў літаратуры. Зразумела, што вельмі хутка спадарыня Гражына дабярэцца да Міцкевіча, і калі мы кажам, як будаваць міжкультурныя масты, то падаецца, што і Міцкевіч ёсць такім мостам.
30-ая «Бардаўская восень» будзе доўжыцца 24-25 кастрычніка ў Бельскім доме культуры. У музычнай частцы заяўлены Хор вольных беларусаў “Гук цішы”, Юстына Карпіловіч, Anduś Kapeła і Кміт-ансамбль. Уваход на ўсе падзеі вольны.
Беларускае Радыё Рацыя
