У Беластоку ў сярэдняй школе нумар 44 імя Станіслава Манюшкі прайшоў агляд калядных калектываў Падляшша – «Гвязды і калядкі». Артысты з Беластоку, Бельска-Падляшскага, Гайнаўкі і іншых мясцовасцяў прадставілі гледачам традыцыйныя для гэтага зімовага часу калядкі.
Гаворыць – старшыня Беларускага грамадска-культурнага таварыства Васіль Сегень:
— „Гвязды і калядкі“ 25 год запар сустракаемся з публікай для якой яшчэ традыцыя калядавання жывая і цікавая. Для многіх, асабліва старэйшага пакалення, нагадвае тыя часы, калі яны самі выступалі з другога боку — як каляднікі, а сёння як гледачы.
Самымі маладымі ўдзельнікамі калядкаў былі дзеткі з калектыва «Вясёлка», дзіцячага садка нумар 14 з дадатковай беларускай мовай навучання ў Беластоку. Гаворыць кіраўнічка калектыва – Альжбэта Баравік.
— Вучым дзяцей падтрымоўваць традыцыю. Такую, якую нашыя бацькі, дзяды, прадзеды хаваюць дагэтуль. Вучым дзяцей у прадшколе калядам, знаёмім з абрадамі, са святамі. Хочам, каб дзеці і спявалі, і падтрымоўвалі традыцыю. Каб корань, які трымаюць іхныя бацькі, быў жывы.
Усяго на агляд «Гвязды і калядкі» са сваімі нумарамі было прадсталена каля двух дзясяткаў калектываў з Падляшша.
Юрась Дзяшук
