У суботу, 1-га сакавіка, у Падляшскім музеі народнай культуры ( ул. Leśna 7, Васількаў) адбудзецца прэзентацыя альбома “Экспедыцыя Вацлава Ластоўскага 1928 году”. Выданне змяшчае каля 300 рэдкіх фотаздымкаў, зробленых падчас этнаграфічнай экспедыцыі на Мазыршчыну і Случчыну.
Кажа супрацоўніца Цэнтра беларускай культуры ў Беластоку Юлія Сівец:
–У альбом увайшлі каля 300 фотаздымкаў. Гэта ўнікальны альбом, таму што паказвае жыццё беларусаў да калектывізацыі на Мазыршчыне і на Случчыне. Вацлаў Ластоўскі быў рэпрэсаваны, а ягоную спадчыну спрабавалі знішчыць. Мог бы знікнуць і гэты альбом. Але дзякуючы мужнасці музейшчыкаў, альбом быў захаваны і падчас ІІ Сусветнай вайны ён быў адпраўлены за мяжу, а менавіта ў Лондан. І арыгінал гэтага альбома знаходзіцца зараз у Лондане.
На прэзентацыі фотаальбома выступіць выдавец Ігар Іваноў. Таксама госці змогуць пабачыць рэканструкцыю традыцыйнага строю і паслухаць капэлу “Бліска”. Дзяцей чакаюць цікавыя майстар-класы. Пачатак а 13-й гадзіне. Уваход вольны.
Цалкам матэрыял:
Вольга Сямашка, Беларускае Радыё Рацыя
