На хвалях нашага радыё адбылася прэм’ера песні “Нядзелька” з новага альбому, менавіта сёння ён з’явіўся ў інтэрнэце, “Мір і супакой”, які запісаў Андрусь Такінданг. Андрусь – Госць Рацыі.
РР: Ты ўжо працяглы час жывеш у Кракаве?
Андрусь Такінданг: Я ў вандроўцы знаходжуся. Два гады творчай камандзіроўкі, гастроляў, дагэтуль не магу вызначыцца і сказаць, што я жыву ў нейкім месцы. Хутчэй я ўспрымаю як нейкую гастролю, як нейкую творчую паездку.
РР: Менавіта Менска, Беларусі ў тваім альбоме вельмі шмат з канкрэтнымі спасылкамі. Ты, дарэчы, да кожнага трэку зрабіў лірык-відэа з уласнымі рухавымі ілюстрацыямі, там шмат Менску, пазнавальных аб’ектаў.
Андрусь Такінданг: Гэта для мяне было важна, таму што такі час добры, каб крыху здаля паглядзець на наш цудоўны горад. І мне здаецца, зараз добры для гэтага час, для такога пераасэнсавання Менска.
РР: “Мір і супакой” – гэта назва хутчэй іранічная, ці як пажаданне міру і супакою?
Андрусь Такінданг: Хутчэй гэта горкая іронія. Таму што, сапраўды, куды ні глянь, ні міру, ні супакою. І я разводжу рукамі, паціскаю плячыма і кажу з такой горыччу: мір і супакой.
РР: Песня “Нядзелька”, я так разумею, прысвечана палітычным зняволеным. Там апісваецца побыт лірычнага героя вельмі відавочна.
Андрусь Такінданг: Так. На жаль, шмат якія песні там маюць канкрэтных герояў. Яны звязаныя з канкрэтнымі людзьмі, якія, на жаль, адбываюць пакаранне і дагэтуль.
Цалкам гутарку слухайце ў далучаным файле:
Стась Дадэрка, Беларускае Радыё Рацыя
