Прапаную звярнуць увагу на зусім свежую краўдфандынгавую пляцоўку пад назвай «Gronka».
Калі скарочана, краўдфандынг – гэта калі вы прымаеце перадзаказ на свой праект, а людзі, якія забяспечваюць працу пляцоўкі, атрымліваюць свой працэнт ад сумы заказу.
У Беларусі самай вядомай краўдфандынгавай платформай быў Ulej (Вулей), і пазней яго адгалінаванне «MolaMola».
Гэта праекты, якімі кіраваў Эдуард Бабарыка, сын колішняга банкіра і цяперашняга палітзняволенага Віктара Бабарыкі.
Праз «Вулей» былі рэалізаваныя сотні культурна і сацыяльна значных праектаў.
А праз «МолаМола» дапамагалі ў самаарганізацыі беларусаў падчас ковіду. Тады, калі дзяржава фактычна кінула людзей сам на сам са страшнай пошасцю.
Цяпер у Беларусі любая дзейнасць з намёкам на самаарганізацыю знаходзіцца пад прыцэлам карных органаў.
Але ўзаемадапамога вельмі патрэбная і за мяжой. Будучы вымушаным эмігрантам, сам ведаю як важна падтрымліваць адзін аднаго.
А таксама вельмі важна працягваць займацца культурнай ды сацыяльнай дзейнасцю і за мяжой. Мы беларусы не мусім знікаць у чужых рэаліях.
Паглядзім, на што сёння збіраюць грошы на пляцоўцы «Gronka».
Выданне рамана Аляксандра Дзюма «Граф Монтэ-Крыста» на беларускай мове; выданне кнігі Беларускіх Калыханак; гайд па беларускіх мясцінах Грузіі; падкаст «Праз космас»; зборнік апавяданняў «Гвалт» Аляксандра Чарнухі; XRayTours Belarus.
Апошні праект варты расшыфроўкі, цытую з сайту: «Мы выкарыстоўваем перадавыя тэхналогіі 3D-мадэлявання для рэканструкцыі ў віртуальным асяроддзі страчаных структур. Наша платформа дае інтэрактыўныя туры з дапоўненай рэальнасцю, дзе карыстачы могуць даследаваць гістарычныя месцы і ўбачыць рэканструяваныя помнікі ў іх гістарычным кантэксце».
Што за людзі пачалі новы краўдфандынгавы праект? Зноў цытую з сайту: «Мы – ананімныя энтузіясты і тэхнічная каманда Паўла Лібера, аб’яднаныя любоўю да творчасці і інавацый».
Павел Лібер – той самы стваральнік сайту «Голас», дзякуючы якому ў сеціве адбыліся альтэрнатыўныя прэзідэнцкія выбары ў 2020 годзе.
Таму я асабіста мяркую, што поспех у новага праекту «Gronka» цалкам можа быць.
