13 студзеня спаўняюцца чарговыя ўгодкі з дня нараджэння Хаіма Суціна – геніяльнага мастака, які нарадзіўся ў 1893 годзе ў мястэчку Смілавічы (тагачасная Расейская імперыя, цяпер Беларусь). Значнасць Суціна падкрэслівае выстава “Вялікія літвакі”, якая прайшла летась у Віленскай філармоніі, дзе Хаім Суцін апынуўся ў адным шэрагу з такімі майстрамі, як Марк Шагал, Восіп Цадкін і Лазар Сегал.
Пра ідэнтычнасць Суціна-мастака разважае культуролаг Мікіта Моніч:
Я так разумею, што ў адрозненні ад Шагала, для Суціна ягонае мастацтва – гэта ў значнай ступені адмова ад сваёй габрэйскай ідэнтычнасці. Але пазіцыянаванне яго праз Літвакоў – гэта добры варыянт, бо ён здымае пытанне аб нацыянальнай прыналежнасці. Каб прэтэндаваць на нацыянальную прыналежнасць Суціна да Беларусі, нам трэба, каб ён быў у пастаянным, якасным ужытку ў Беларусі.
Адпаведна 2024 год стаў удалым для імя Хаіма Суціна на арт-рынку. Яго працы дэманструюць устойлівы попыт, а па выніках аўкцыёнаў ён апынуўся ў адным шэрагу з Маркам Шагалам – яшчэ адным мастаком з Беларусі, але з сусветным імем. Карціны Суціна, вядомыя сваёй экспрэсіяй, насычанасцю колеру і эмацыйнай сілай, сталі прадметам буйной здзелкі, перасягнуўшы чаканні экспертаў.
Фота nashagazeta.ch, obzor.lt, Веры Вакулавай:
Беларускае Радыё Рацыя
