Сёння адзначаецца 95-годдзе з дня народзінаў аднаго з пачынальнікаў беларускага літаратурнага руху на Падляшшы – Яшы Бурша.
У 1964 годзе дадаткам да газеты беларусаў у Польшчы “Ніва” быў выдадзены ягоны зборнік вершаў «Прамень думкі». Дасёння ён не згубіў свае мастацкія якасці. Пра Яшу Бурша кажа супрацоўніца «Нівы» і старшыня літаратурнага аб’яднання «Белавежа» Міра Лукша:
-Жывога не бачыла, на здымках толькі. Я размаўляла нават з нейкай сваячкай, бо калі мы пачалі шукаць інфармацыю пра Яшу Бурша, то Юрка Валкавыцкі кажа, што ён дзесьці ў Варшаве жыве і ён вядомы мастак. Яшчэ сёння яго малюнкі і карціны можна знайсці ў галерэях. Калі ён выязджаў пасля вайны з Беларусі ў Польшчу, то змяніў прозвішча. Бо быў падчас акупацыі ў Саюзе беларускай моладзі. Сапраўднае яго імя Іван Богша.
На жаль, Яша Бурш у сярэдзіне 70-х гадоў спыніў сваю літаратурную дзейнасці, набыў мастацкую адукацыю і стаў вядомым мастаком.
Быў лаўрэатам многіх польскіх ды міжнародных прэмій, меў больш за 50 ўласных выставаў жывапісу (як польскіх, так і міжнародных). Яго карціны захоўваюцца ў многіх прэстыжных музеях.
Цалкам гутарку слухайце ў далучаным файле:
Беларускае Радыё Рацыя
