У Беластоку 15 лютага ў прасторы “Новая Зямля” адбылася прэзентацыя кнігі «Ген мігранта. Пачатак» камунікацыйнага кансультанта і аўтара сацыяльных праектаў Андрэя Эзерына.
«Праблемы пенсіянераў, якія апынуліся ў эміграцыі, падштурхнулі мяне да напісання гэтай кнігі», – кажа аўтар.
– Што тычыцца мяне, то гэта дакладна не літаратурная амбіцыя. Я прафесійны камунікацыйны кансультант, і справа ў тым, што даволі доўгі час я распрацоўваў розныя сур’ёзныя стратэгіі і для іншых. Але зараз я сам апынуўся ў сітуацыі, калі такая стратэгія неабходна мне. Калі дапамога ўжо неабходна мне, і я маю на ўвазе людзей сталага ўзросту, якія апынуліся ў эміграцыі.
Спрабуючы асэнсаваць праблемы беларускіх пенсіянераў у эміграцыі, Андрэй Эзерын прыйшоў да высновы, што гэта лепш зрабіць у фармаце кнігі.
– Я бачу цэлы шэраг праблем, звязаных з гэтым, бо ўсё гэта я прайшоў сам у эмігацыі за мінулыя чатыры гады, і таму я стаў выбіраць як прафесіянал інструментарый, і я спыніўся на такім фармаце – як кніга.
«Я не псіхолаг, але людзі, якія займаюцца камунікацыяй, маюць пэўны досвед, разуменне, як дапамагаць чалавеку. Ва ўсіх 25 маіх фрашках ці гісторыях прыхаваныя лайфхакі», — кажа Андрэй Эзерын пра сваю кнігу.
Цалкам матэрыял:
Беларускае Радыё Рацыя
