У вёсцы Орля завяршыўся фестываль яўрэйскай культуры „Mimo wszystko SZALOM!”, які сабраў гасцей з розных рэгіёнаў і стаў прасторай сустрэчы культур, памяці і дыялогу.
Наведвальнікі даследавалі сувязі паміж будызмам і юдаізмам, удзельнічалі ў майстар-класах, аглядалі мастацкія выставы і слухалі жывую музыку. Кульмінацыяй сталі канцэрты Яроны Каспі, Ізабэлы Шафраньскай з гуртом і выступ клезмерскага трыа Street Whispers.
Пра значэнне падзеі кажа арганізатар фестывалю, захавальнік сінагогі і солтыс Орлі Марэк Хмялеўскі:
– Фестываль міжнародны. Тут артысты не толькі з Беларусі, але і з Нідэрландаў. Гэта будаванне вобразу нашай мясцовасці. Я, як солтыс, мушу падтрымліваць традыцыю мясцовага жыцця, і каб мая мясцовасць была вядомая з добрага боку. Міжкультурна мы тут усе мірна жылі і хочам каб і надалей было ўсё мірна і супольна.
Важнай часткай праграмы стала экскурсія па гістарычнай сінагозе, якую правёў Павел Хруль:
– Ёсць тут багатая сімволіка. Не ўсё цяпер мы можам пабачыць. Не ўсё захавалася. Мы можам пабачыць, што ёсць 12 вокнаў, як месяцаў у годзе, як пакаленняў Ізраіля. Леў, арол з двума галовамі – гэта ў юдаізме ласка і суд.
Фестываль «Mimo wszystko SZALOM!» адбыўся пры падтрымцы Фонду EFC у межах Грамадзянскага фонду імя Людвікі і Генрыка Вуйцаў, Урада гміны Орля, Гарадскога прадпрыемства цеплаэнергетыкі і Камунальнага прадпрыемства ў Бельску-Падляшскім, а таксама дзякуючы падтрымцы прыватных спонсараў.
Цалкам матэрыял:
Беларускае Радыё Рацыя
