28 студзеня, у музеі Максіма Багдановіча ў Менску адбудзецца чарговая сустрэча “ЛабаРАторыі паэтычнай метафізікі”, прысвечаная беларускай і сусветнай традыцыі метафізічнай паэзіі / інтэлектуальнай літаратуры. Тэма сустрэчы: “Францішак Багушэвіч. Метафізіка першапачатку”.
Францішак Багушэвiч – беларускi Кафка. Ён традыцыйна чытаўся (i чытаецца) як этнаграфія, бачыцца вачыма сэнтыментальна-народнiцкiмi. Космас Багушэвiча – змрочны, трагiчны, разарваны. За спінай шляхецкая цывілізацыя і выпадзенне з гісторыі. Наперадзе – незразумелы і няўтульны горад. Перад вачыма – занядбаны, хаця й родны кут, “хатка”, у якой мусіць паўставаць новая суб’ектнасць, культура, навука, заводы й універсітэты.
Як гэта ўвогуле мажліва? Адкуль з’явілася сіла, энергія? З чаго ўсё разгарнулася? Як мы бачым Багушэвіча сёння, праз амаль паўтары стагоддзі з выхаду “Дудкі беларускай”?
Мадэратар: Ігар Бабкоў
Уваходны квіток 5 рублёў.
