25 кастрычніка ў Палацы культуры горада Ліды адбудзецца Гарадзенскі абласны фестываль народнай музыкі “Зайграйце, музыкi!”.
Мерапрыемства на Гарадзеншчыне праходзіць адзін раз у два гады, з мэтай папулярызацыі інструментальнай музыкі, садзейнічання мастацкаму развіццю і павышэння выканальніцкага ўзроўню ансамбляў народнай музыкі і аркестраў народных інструментаў.
На суд журы калектывы Гарадзеншчыны прадставяць па два творы, адзін з якіх павінен быць творам беларускага аўтара. У фестывалі прымуць удзел лепшыя дарослыя і дзіцячыя аркестры народных інструментаў, ансамблі народнай музыкі і песні, інструментальныя ансамблі (акрамя дуэтаў, трыа), незалежна ад ведамаснай прыналежнасці.
Па выніках фестывалю журы вызначае лаўрэатаў (I, II, III ступеняў) па дзвюх катэгорыях (дарослы і дзіцячы) у наступных намінацыях: аркестр народных інструментаў; інструментальны ансамбль (акрамя дуэтаў, трыа); ансамбль музыкі і песні.
Гарадзенскі фестываль народнай музыкі і песні “Зайграйце, музыкі!” стане жаданым святам для ўсіх, хто любіць меладычную беларускую народную музыку.
Беларускае Радыё Рацыя
