На другі дзень фэста «Бардаўская восень» ў Бельску адбылося ўручэнне прэміі імя Міхала Анемпадыстава. Уручала прэмію старшыня Беларускага ПЭНу, праваабаронца, менеджарка культурніцкіх праектаў, літаратарка Таццяна Нядбай.
Па словах Таццяны, было важна, каб уручэнне прэміі таксама пабачылі і ў Беларусі:
-Апынуўшыся ў вымушаным выгнанні, безумоўна, стараемся выкарыстоўваць усе магчымасці, каб не канцэнтраваць сваю дзейнасць толькі ў адным месцы. Напрыклад, у Варшаве. Бо мы выдатна разумеем, што беларусы знаходзяцца ў розных гарадах, у розных краінах, безумоўна, і ў Беларусі таксама. І таму для нас важна рабіць анлайн-трансляцыі, каб кожны мог далучыцца.
Прэмія імя Міхала Анемпадыстава вельмі асаблівая, як і сёлетнія яе пераможцы, адзначыла старшыня Беларускага ПЭНу:
– Пераможцамі сталі два чалавекі «за выкшталцоны дызайн кнігі як арт-аб’екта, за паважлівае хуліганства, за вокладку, што не саромеецца быць адметнай». Прэмія ўручана за вокладку кнігі «Мое баба – діректор морга» Голі з Ополя Ігару Юхневічу і Марыі Мароз.
Таццяна спадзяецца, што прэмія стане прыступкай для далейшага развіцця беларускіх дызайнераў, а таксама спадарыня Нядбай зазначыла, што адзін з сёлетніх пераможцаў быў прадстаўлены ў 4-х з 6-ці працаў, якія намінаваліся на сёлетнюю прэмію і былі прадстаўлены ў кароткім шорт-лісце.
Беларускае Радыё Рацыя
