Цэнтр беларускай культуры ў Беластоку выдаў новую кнігу Ганны Кандрацюк “Проста з любові. Рэпарцёрскія партрэты памяці”, у якую ўвайшлі тэксты пра 7 выбітных асобаў.
Аўтарка падзялілася навіной у фэйсбуку і расказала, чые менавіта партрэты знойдуць чытачы на старонках кнігі — Кастуся Каліноўскага, Ежы Папялушкі, святой Марыі (Петручук), Алеся Пушкіна, Юркі Гіля, Надзеі Артымовіч і Юры Гумянюка.
Ганна Кандрацюк таксама дзеліцца ўражаннямі пра кнігу паэта Уладзіміра Някляева:
“Даўно не чытаў я нічога з такім задавальненнем, як рэпартажы Ганны Кандрацюк, сабраныя штотыднёвікам “Ніва” для яе новай кнігі. Па сутнасці іх можна аднесці да нон-фікшн, жанру сучаснай літаратуры, бо ў іх заяўляюць пра сябе, даводзяць сваё і дзейнічаюць дзясяткі рэальных персанажаў са сваімі лёсамі і характарамі, якія кожны па-свойму ацэньваюць гістарычную ролю, трактуюць лёс і характар галоўнага героя: ці гэта паэт Гумянюк, ці рэвалюцыянер Каліноўскі. Прычым, ацэнкі гэтыя, як і ёсць яно ў рэальным жыцці, далёкія ад супадзенняў, часам проста процілеглыя”.
