У ноч на 5 ліпеня на 50-м годзе жыцьця ад наступстваў анкалагічнага захворвання памёр Андрэй Бардухаеў-Арол, паведамляе «Флагшток».
Гэта адбылося ў Польшчы, дзе гамяльчанін жыў апошнія гады. У Андрэя засталіся жонка і чацвёра дзяцей. Пра тое, што ў яго цяжкая хвароба, стала вядома ў снежні 2024 года.
У 2020 годзе Андрэй і ягоная сям’я падтрымалі пратэсты ў Беларусі. Пасля гэтага гомельскія ўлады звольнілі мужа і жонку з Беліцкага дому культуры і пазбавілі пляцоўкі. У 2021 годзе, праз пагрозу крымінальнага пераследу, ім давялося пакінуць краіну.
Пасля пераезду ў Варшаву яны працягнулі тэатральную дзейнасць і аднавілі праект «Атмасферныя спектаклі для невідушчых» ужо ў польскіх умовах.
Апошняй роляй Андрэя быў Пісьменнік у спектаклі «Ордэн Белай Мышы» паводле твору Уладзімера Арлова. Актор выконваў яе ўжо з цяжкай стадыяй анкалогіі, расказаў ягоны калега Ігар Сігоў, які выходзіў на сцэну ў ролі Караля.
БАЖ публікуе просьбу пра дапамогу сямʼі.
Беларускае Радыё Рацыя
Фота: «Флагшток»
