На Падляшшы адбываецца прэзентацыя кнігі «Перасяленцы ці бежанцы? Пра беларусаў, пераселеных з Польшчы ў Беларусь у 1944 – 1948 гадах». Першая такая прэзентацыя адбылася ў вёсцы Тапілец, што месціцца ў гміне Туроснь-Касцёльная на Беласточчыне, адкуль выехала ў той час у БССР і далей углыб СССР да 80 адсоткаў мясцовых беларусаў. Наступная ўжо заўтра ў Беластоку.
Гаворыць дырэктар Беларускага цэнтра культуры, які ладзіць такія прэзентацыі Анатоль Вап і жыхары мясцовасці Тапілец:
-Усіх запрашаем і будзем, вядома, рабіць далей у іншых гарадах і вёсках нашага ваяводства. Плануем рабіць, між іншым, у Бельску, Гайнаўцы і іншых мясцінах. Галоўнае там, адкуль людзі найбольш выязджалі, якія маюць свае ўспаміны, бо таксама хочам паразмаўляць, можа пазбіраем яшчэ якія ўспаміны, фотаздымкі, дакументы.
-Расказваюць людзі, што 80% жыхароў з Тапілец і ваколіц выехала. Вельмі моцны быў ціск з боку падполля. Людзі проста адсюль уцякалі.
-Вельмі добра, што з’явілася гэтая кніжка, і нашчадкі гэтых людзей, якія былі вымушаныя пакінуць сваю малую Айчыну, пра гэта помняць.
Прэзентацыя кнігі «Перасяленцы ці бежанцы? Пра беларусаў, пераселеных з Польшчы ў Беларусь у 1944 – 1948 гадах» у Беластоку адбудзецца ў Падляшскай бібліятэцы па адрасе: вул. Марыі Складоўскай-Кюры 14А, у чацвер 5 лютага. Пачатак а 17-й гадзіне.
Цалкам матэрыял:
Юрась Дзяшук, Беларускае Радыё Рацыя
