Беларускі аналаг YouTube, які атрымаў назву videobel.by, збіраюцца запусціць 12 верасня. Там будуць паказваць у асноўным дзяржТБ. «Кіберпартызанам» сталі вядомы некаторыя дэталі пра гэты праект.
Інфармацыйнае агенцтва БелТА на загад Лукашэнкі занялося праектам беларускага відэасэрвісу з пачатку 2023 года. У першы год спадзяюцца максімум на 3 тысячы наведвальнікаў адначасова. А на другі год чакаюць не больш за 20 тысяч адначасовых падключэнняў і да 50 тысяч падчас грамадска значных падзей.
Супрацоўнікі БелТА падлічылі, што ім на першы год трэба 1,5-2 млн. даляраў ЗША, а штогадовыя выдаткі, пачынаючы з другога года, складуць прыкладна 1 млн. даляраў.
