Легенда беларускага рока на Падляшшы вяртаецца. Гурт Rima з Гарадка выступіць сёння, 15 лютага, з юбілейным канцэртам у Гарадоцкім гмінным цэнтры культуры.
Гурт узнік роўна 25 гадоў таму, аднак ажно на 13 гадоў спыніў сваю дзейнасць. Арганізатарам канцэрту ёсць мясцовы цэнтр культуры і Цэнтр беларускай культуры з Беластоку.
Гаворыць прадстаўнік Цэнтра беларускай культуры Міхась Грэсь:
– Гурт Rima паўстаў пасля гурта Braga. Гурт існаваў 10 гадоў. Хлопцы гралі на беларускай мове. І затым дзейнасць гурта спынілася. 15 лютага будзе канцэрт у Доме культуры з нагоды 25-годдзя паўстання гурта Rima. Так што калі ідзе пра наш наступны беларускі акцэнт, то ў Гарадку надалей беларуская культура працуе, трывае і бурліць.
Пачатак юбілейнага канцэрту сёння ў гмінным цэнтры культуры ў Гарадку а 18-й гадзіне. Таксама на сцэне выступяць гурты Ilo&Friends і Black Birds’ Theatre.
Беларускае Радыё Рацыя
