Брэндавае свята пісанкі пройдзе 27 красавіка ў аграгарадку Сапоцкін у Гарадзенскім раёне, перадае БЕЛТА.
У Сапоцкіне і яго ваколіцах унікальны чорна-белы роспіс велікодных яек існуе не адно стагоддзе і перадаецца майстрыхамі з пакалення ў пакаленне, расказалі ў мясцовым Цэнтры культуры і народнай творчасці: “Чорны колер у малюнку – асноўны, ён сімвалізуе шчодрую зямлю, светлыя ўзоры на ім – сімвал чысціні”.
У сапоцкінскім рэгіёне сёння восем носьбітак народнай традыцыі стварэння сапоцкінскай пісанкі. Яе мастацтва ўнесена ў Дзяржаўны спіс гісторыка-культурных каштоўнасцей Беларусі.
У аграгарадку створаны музей пісанкі, дзе захоўваецца звыш 1,7 тыс. распісных яек, расказала кіраўніца Сапоцкінскага цэнтра культуры і народнай творчасці Аксана Станкевіч.
27 красавіка тут пройдзе брэндавае Свята пісанкі, дзе роспісу па яйках усіх жадаючых навучаць мясцовыя ўмеліцы і запрошаныя майстрыхі з усёй вобласці і нават з іншых рэгіёнаў. Свята пройдзе ў двары Цэнтра культуры.
Фота: БелТА
