У Беластоцкай філармоніі, на самай прэстыжнай выставачнай пляцоўцы ў горадзе, адкрылася выстава «Podlaski wymiar sztuki 2». У ёй удзельнічаюць 15 мастакоў з розных куткоў Падляшша, зрабіўшы адмысловую панараму мастацкага жыцця краю.
Кажа куратар выставы, мастачка Бернарда Нікітаровіч:
– Канцэпцыя такая, каб паказаць мастакоў, якія жывуць на Падляшшы, але па-за Беластокам. Гэта Сувалкі, Гайнаўка, Бельск-Падляшскі, Драгічын, Супрасль, Семятычы, Замбрув, Ломжа. З усіх тых мясцінаў, якія ствараюць нашую адметную падляшскую ідэнтычнасць. Гэтыя мастакі не маюць такой магчымасці, як мы ў Беластоку, паказваць публіцы сваю творчасць. А я ведаю, як мастачка, якую вялікую ролю мае такая матывацыя, адразу інакш малюецца, хочацца выстаўляцца.
Галоўным арганізатарам выставы выступіў Фонд «Маршанд».
Кажа яго кіраўнік Януш Жабюк:
– Зрабілі мы выставу «Podlaski wymiar sztuki 2». Каб мастацтва на Падляшшы было бачна, каб натхніць мастакоў да творчасці, каб адчувалі, што варта тварыць, каб абчувалі зацікаўленасць сваёй творчасцю. А ў многіх рэгіянальных мастакоў сёння няма такога пачуцця. Таму мы прыдумалі такую выставу, на якой прэзентаваная творчасць мастакоў з падляшскіх рэгіёнаў.
Выстава «Podlaski wymiar sztuki 2» будзе працаваць да 19 снежня. Даступная ў часы працы філармоніі, уваход бясплатны.
Цалкам матэрыял:
Беларускае Радыё Рацыя
