У Беластоку ў цэнтры культуры імя Заменгофа адкрылася выстава Кацярыны Ваданосавай.
Выстава мае назву STROJ і на ёй прадстаўленыя 14 рэканструкцый строяў, вырабленых уручную, якія адлюстроўваць моду розных эпох – ад ХІ стагоддзя да пачатку XX стагоддзя.
Сваімі ўражаннямі пра выставу падзялілася Аліна Коўшык – прадстаўніца па нацыянальным адраджэнні Аб’яднанага Пераходнага Кабінета.
– Я атрымлівала запрашэнне на адкрыццё выставы яшчэ ў Цеханоўцы, але праца і іншыя абавязкі, таму, на жаль, не змагла наведаць. Мне было сумна. Але я дала сабе абяцанне, што калі будзе працяг, я абавязкова наведаю. І таму я сёння тут. Адмыслова для гэтай выставы прыехала з Варшавы. Але паверце мне, гэта абсалютна невялікая дарога, каб пабачыць гэты цуд, гэтую прыгажосць. Я перакананая, што гэтая выстава павінна быць у Мастацкім музеі ў Беларусі, перакананая ў тым, што гэтую выставу трэба паказаць у польскім этнаграфічным музеі.
Па словах Анатоля Вапа, дырэктара Цэнтра Беларускай Культуры ў Беластоку, гэтая экспазіцыя паказвае гісторію і сучаснасць:
– Гэтая выстава важная з некалькіх прычын: па-першае, яна пра гісторыю, па-другое, яна пра традыцыю, і па-трэцяе, яна пра сучаснасць беларусаў. Яна сягае ў глыб беларускай гісторыі – да першай беларускай дзяржавы Полацкага княства. Традыцыя, сімволіка, узоры – яшчэ глыбей, бо гэта яшчэ дахрысціянскія часы, але таксама паказвае сучаснасць.
Выставу можна будзе паглядзець у Беластоку да 28 лістапада ў часы працы Цэнтра культуры імя Заменгофа.
Для прысутных падрыхтаваны невялічкі канцэрт і імправізаваная экскурсія па выставе.
Перад наведвальнікамі выставы выступіла Аліна Коўшык – прадстаўніца па нацыянальным адраджэнні Аб’яднанага Пераходнага Кабінета.
Кацярына Ваданосава выканала песні падчас канцэрту.
Беларускае Радыё Рацыя
