У культурнай прасторы і пабе B4you у Беластоку адбылося незвычайнае музычнае падарожжа — канцэрт беларускага блюзу.
На імправізаванай сцэне выступіў вядомы музыкант з Бялынічаў Юрый Несцярэнка, якога часта называюць «каралём беларускага блюзу». Выступ сабраў некалькі дзясяткаў слухачоў, якія мелі магчымасць адчуць непаўторную атмасферу гэтага жанру.
Музыканту дапамагаў кіраўнік Беластоцкага Музычнага клуба Антось Сіроцін:
– Юрыя Несцярэнку я ведаю даволі даўно, ужо мо гадоў дваццаць, але ніколі не спаткаўся з ім сам-насам, то бок я ведаў пра яго творчасць, пра яго дзеянні. І для мяне ён такі чалавек, які марыць і рэалізуе свае мары. Я ў ім бачу вялікае падабенства да таго, што атрымоўваецца зараз. Таму для мяне гэта, як прыклад.
Па словах Юрыя Несцярэнкі канцэрт у Беластоку яму вельмі спадабаўся:
– А мы вельмі хваляваліся. Дакладней, я не хваляваўся, а вось знаёмыя мае калегі-музыканты хваляваліся, ці прыйдзе народ, ці збяруцца людзі. Усё выдатна, у мяне не было адчуванне пустой залі, так што ўсе – па-сапраўднаму блюзавая публіка, якая сабралася на нейкі час. Гэта ўстанова ператварылася ў блюзавую ўстанову ў лепшых традыцыях.
Арганізатарам імпрэзы быў Беластоцкі музычны клуб, які «спыніў» сваё існаванне ў прасторы і пабе B4you, але па словах Антося Сіроціна канцэрты працягнуцца на іншых пляцоўках Беластока.
Цалкам матэрыял:
Беларускае Радыё Рацыя
