Да гадавіны Варшаўскага паўстання ў беластоцкім музеі войска пачала працу выстава ў гонар Валерыяна Бялецкага. Вядомага ўдзельніка паўстання, а ў будучыні – галоўнага архітэктара Беластока, які аднаўляў горад пасля вайны. Аб асобе Валерыяна распавёў аўтар выставы Марцін Казіньскі:
— Сёння разам мы можам ушанаваць памяць паўстанцаў, удзельнікаў, герояў падзей 80-гадовай даўніны. Адзін з найважнейшых для нас герояў – Валерыян Бялецкі, на псеўданім Інжынер Ян, што ўвайшоў у вялікую гісторыю як стваральнік паўстанцкага аўтамабіля «Kubuś».
У экспазіцыю ўвайшлі фотаздымкі, малюнкі-напрацоўкі Валерыяна, а таксама фільм Кацярыны Савіцкай, якая прысвяціла стужку свайму знакамітаму дзеду. Наведаць выставу можна будзе да 2 кастрычніка.
Беларускае Радыё Рацыя
