Нацыянальны санктуарый у Будславе вымушаны працягваць рэстаўрацыю без фінансавання з боку дзяржавы, нягледзячы на тое, што па ініцыятыве ўлад ён быў абвешчаны «духоўным цэнтрам» католікаў Беларусі. 16 лютага парафія распаўсюдзіла зварот аб тым, што «мае патрэбу ў дапамозе».
Санктуарый апублікаваў ліст пробашча, адрасаваны да ўсіх, хто можа зрабіць ахвяраванне. У лісце гаворыцца пра тое, што пасля прызначэння будслаўскага касцёла «духоўным цэнтрам» быў распрацаваны план мерапрыемстваў на выкананне рамонтна-рэстаўрацыйных прац.
Парафія просіць аказаць любую спонсарскую дапамогу. Агульная сума, якая патрэбна ўжо ў бліжэйшы час (толькі на падрыхтоўчыя працы), – амаль 1 млн 700 тыс. рублёў, што перавышае суму ўсіх ахвяраванняў, якія былі сабраныя дагэтуль пасля пажару ў касцёле – 1 млн 446 тыс. рублёў.
