Выстава, прысвечаная Нёману, працуе ў Гарадзенскай абласной бібліятэцы. У экспазіцыю ўвайшло больш за 400 экспанатаў, піша hrodna.life.
На выставе прадстаўлены здымкі Гародні мінулых стагоддзяў – па іх можна ўбачыць, як мяняўся горад і берагі ракі. Таксама паказаныя фатаграфіі пляжнага адпачынку гарадзенцаў. Увайшлі ў экспазіцыю старажытныя кнігі, прадукцыя прадпрыемстваў з маркай «Нёман» (шклозавод, абутковая фабрыка, спортклубы і санаторыі). Ёсць і экспанаты часоў СССР: вазы, духі, абутак і часопісы «Нёман». Асобны блок у выставе займае гісторыя авіяпалка «Нармандыя-Нёман», які ваяваў у Другой сусветнай вайне.
Выстава праходзіць у абласной бібліятэцы Карскага на вул. Карбышава, 17. Экспазіцыя будзе працаваць да 20 кастрычніка.
