25 студзеня ў Дзяржаўным музеі гісторыі беларускай літаратуры адкрылася часовая экспазіцыя “Васіль Быкаў. Жыццё праз абрысы і лініі”, прымеркаваная да 100-годдзя з дня нараджэння народнага пісьменніка Беларусі Васіля Уладзіміравіча Быкава.
На выставе прадстаўлена больш за 70 графічных і жывапісных работ Васіля Быкава. Краявіды, хаткі, падворкі з часоў дзяцінства, успаміны пра вайну, выпадкі з жыцця – шмат каштоўных падзей зафіксавалі аловак і пэндзаль пісьменніка.
Акрамя таго, увазе наведвальнікаў прадстаўлены фотаздымкі, кнігі, рукапісы, лісты, дакументы, асабістыя рэчы, прадметы адзення і аксесуары Васіля Быкава з фондаў Дзяржаўнага музея гісторыі беларускай літаратуры.
Экспазіцыйныя матэрыялы раскрываюць тэмы: “Дзяцінства”, “Ваенныя ўспаміны”, “Творы Быкава ў іншых відах мастацтва”, “Жыццё і творчасць пад мірным небам”.
Выстава будзе дзейнічаць да 5 траўня 2024 года.
