24 чэрвеня ў канферэнц-зале Нацыянальнай акадэміі навук Беларусі адбылося развітанне з выбітным беларускім навукоўцам, геолагам і грамадскім дзеячам Радзімам Гарэцкім. Ён пайшоў з жыцця 22 чэрвеня на 97-м годзе. Развітальнае мерапрыемства прайшло без ужывання беларускай мовы.
Нават афіцыйная абвестка на сайце Акадэміі навук была цалкам на расейскай. Сітуацыю пракаментаваў гісторык Аляксандр Пашкевіч:
-Тое, што на развітанні з Радзімам Гарэцкім было аформлена ўсё па-расейску, не абавязкова звязана з нейкай свядомай палітыкай, што вось хацелі яго прынізіць адмыслова – чалавека, які ўсё жыццё змагаўся за беларускую мову і для якога беларуская мова была несумнеўнай каштоўнасцю. Так ужо афіцыйна напісалі па-расейску. Думаю, што праблема ў тым, што гэта вось такая беларуская абыякавасць да моўнага пытання.
Радзім Гарэцкі быў сынам акадэміка Гаўрылы Гарэцкага і пляменнікам пісьменніка Максіма Гарэцкага. Ён стварыў першую тэктанічную карту Беларусі, узначальваў Інстытут геахіміі і гефізікі, быў віцэ-прэзідэнтам Акадэміі навук. Удзельнічаў у працы Таварыства беларускай мовы, Згуртавання «Бацькаўшчына», выступаў за незалежнасць Беларусі і беларусізацыю навукі.
Цалкам гутарка:
Беларускае Радыё Рацыя
Фота з адкрытых крыніц
