Міністэрства асветы Расеі даслала Саюзу кінематаграфістаў спіс фільмаў і кніг для стварэння рэмэйкаў і экранізацыяў, сярод іх — фільмы па творах беларускага пісьменніка Васіля Быкава, паведамілі ў Саюзе кінематаграфістаў Расеі.
У пераліку гістарычных фільмаў для стварэння рэмэйкаў Мінасветы пазначаныя:«Абеліск», «Сотнікаў», «Узыходжанне», «Альпійская балада».
Міністэрства прапануе зрабіць рэмэйкі пералічаных і шэрагу іншых гістарычных фільмаў, а таксама экранізаваць 15 твораў расейскай літаратуры «ў мэтах вытворчасці мастацкіх фільмаў для дзяцей і юнацтва, якія спрыяюць захаванню гістарычнай памяці і фармаванню патрыятызму».
Тым часам «Беларусьфільм» у рамках «выхавання патрыятызму» ў беларускай моладзі цяпер працуе над стварэннем фільму «Культурны код». Прэм’еру фільма плануюць на 17 верасня, у так званы «Дзень народнага адзінства».
