У Варшаве адкрылі выставу карцін загінулага ў турме палітвязня і мастака Алеся Пушкіна. У экспазіцыі выставы можна пабачыць паўтара дзясятка арыгінальных карцін таленавітага беларуса.
На пляцоўцы Беларускай прасторы «Робім Разам» адкрылася выстава арыгінальных карцін Алеся Пушкіна, беларускага мастака, жывапісца, перформера. У сакавіку 2021 года Пушкін быў затрыманы праз палітычны пераслед – пазней яму прысудзілі 5 гадоў калоніі. Мастак памёр у рэанімацыі ў Гародні 11 ліпеня 2023 года, куды яго даставілі з турмы.
Алесь Пушкін часта выстаўляў свае творы на выставах і аўкцыёнах у Польшчы, дзякуючы чаму атрымалася сабраць арыгінальныя творы мастака сярод польскіх прахільнікаў яго творчасці. Як распавялі арганізатары выставы, карціны з універсітэту і двух прыватных калекцый.
Прывітальнае слова да арганізатараў і ўдзельнікаў выставы карцін Алеся Пушкіна выказала старшыня рады БНР Івонка Сурвіла. З цёплымі словамі пра мастака выступілі таксама сябры Алеся Пушкіна. Прагучала шмат кранальных слоў пра Алеся Пушкіна і яго творчасць.
Адкрыццё выставы прымеркавалі да Дня Волі. Алесь Пушкін, студэнт тэатральна-мастацкага інстытута, у 1989 годзе быў першым, хто зладзіў мітынг да Дня Волі. За гэтую акцыю ён быў засуджаны да 2 гадоў умоўнага пазбаўлення волі.
Беларускае Радыё Рацыя
