Сталічныя ўлады адмовіліся ад планаў пераезду Нацыянальнага гістарычнага музея ў Пішчалаўскі замак на вуліцы Валадарскага ў Менску, дзе да нядаўняга часу размяшчаўся следчы ізалятар № 1.
Пра гэта паведаміў старшыня камітэту архітэктуры і горадабудаўніцтва Менгарвыканкаму Віктар Гуцько, піша «Минск новости». На пытанне вядоўцы праграмы, ці праўда гэта, што, паводле неафіцыйнай інфармацыі, у Пішчалаўскім замку плануюць размясціць Нацыянальны гістарычны музэй, ён адказаў:
«Так, сапраўды разглядалася такая магчымасць, але ад гэтай ідэі адмовіліся, размяшчэнне Нацыянальнага гістарычнага музея ў гэтым комплексе не плануецца», — заявіў Гуцько.
Паводле яго, гарадскія службы «вядуць працу над тым, каб прыстасаваць гістарычны аб’ект пад іншыя функцыі». Пад якія менавіта — чыноўнік не ўдакладніў.
