У Беластоку адбудзецца шостая спроба пабіць рэкорд Польшчы па бесперапынным выкананні блюзу. VI Падляшскі блюз-марафон працягнецца 33 гадзіны і будзе арганізаваны ў Pub Sześcian. Папярэдні рэкорд у 32 гадзіны быў усталяваны летась. Сёлета імпрэза праходзіць пад лозунгам «Блюз і малодшыя браты».
Музычнае свята адкрые легенда польскага і беластоцкага блюзу Kasa Chorych, якая выступіць у акустычным фармаце. Канцэрт пачнецца ў пятніцу, 13 снежня, а 17:00.
Далей слухачоў чакае выступ мясцовага рэпера Cira, вядомага сваім цыклам альбомаў «Паштоўкі з горада B». Пасля яго на сцэну выйдзе дуэт Jorgos Skolias і Гжэгаж Каполка — прызнаныя майстры блюзу.
Вечар завершаць блюз-рокавыя гурты. Luki Kulczak Electric Band аддасць даніну легендарнаму гітарысту Джефу Бэку, а Gęsia Skórka Blues Band выканае аўтарскі рэпертуар.
У начным блоку з пятніцы на суботу выступяць мясцовыя гурты, уключаючы The BL Blues Band, Электрычную Папугу і Deep Blues Rock Band. Маладыя калектывы, такія як Eliot Graves і Lucky Looser Blues Band, прадставяць сучасны погляд на блюз.
Суботні ранак пачнецца з выступлення гуртоў з розных рэгіёнаў Польшчы: Kłusem z Bluesem (Рашаў-Варшава), Blues Friends (Зялёна Гура), BR Blues Band (Жоры) і Cotton Wing (Чэнстахова).
Фінальная частка ўключыць выступы сусветных зорак. Польска-амерыканскі дуэт Joanna Dudkowska & Chuc Frazier (ЗША) уразіць сваёй энергетычнай праграмай. Пасля іх на сцэну выйдуць брытанскія спявачкі Sarah Quist і Katie Bradley ў суправаджэнні Yesway Band.
Заключны акордам марафону стане выступ легенды польскай гітары блюзу Лешка Ціхоньскага з удзелам Jose Torres і фінальны джэм-сейшн з мясцовымі блюзменамі Białystok Blues Session.
Завяршэнне марафону запланавана на нядзелю, 15 снежня, а 2:00 ночы.
Імпрэза праводзіцца пры падтрымцы самакіравання Падляшскага ваяводства, а таксама пад ганаровым патранатам маршалка ваяводства. Арганізатарам выступае фонд «Polacy znad Niemna», які супрацоўнічае з беластоцкімі музыкамі. Мэта фестывалю — прасоўванне блюз-музыкі і развіццё музычнага іміджу Падляшша.
Беларускае Радыё Рацыя
