У выдавецтве “Варштаты культуры ў Любліне” выйшла ўнікальная кніга “Нарысы пра найноўшы беларускі тэатр: 2010-2020”, якая апрача беларускай версіі мае польскую. Гэта калектыўная манаграфія пра перыяд імклівага развіцця айчыннага тэатру. Сувыдавец — Беластоцкі асяродак культуры. Пра кнігу кажа літаратуразнаўца і перакладчыца Наталля Русецкая, якая прэзентавала гэтую кнігу на фестывалі «Прадмова».
— Кніга складаецца з асобных артыкулаў, напісаных беларускімі тэатразнаўцамі, пераважна тымі, хто страціў працу пасля таго, як пачаліся рэпрэсіі ў Беларусі. Таму ўсе аўтары схаваныя пад псеўданімамі. Мы не знойдзем тут звыклых і вядомых нам імёнаў. Кніга выйшла летась па-польску ў выдавецтве „Варштаты культуры ў Любліне“ ў серыі „Усходні экспрэс“, і сёлета яна выйшла па-беларуску.
Цалкам слухайце ў далучаным гукавым файле:
“Нарысы пра найноўшы беларускі тэатр: 2010-2020” былі створаныя калектывам аўтараў, аб’яднаных агульнай ідэяй — захаваць найноўшую гісторыю беларускага тэатра. Аўтары перакананыя, што гэты перыяд можна смела назваць рэнесансам тэатральнай культуры Беларусі.
Беларускае Радыё Рацыя
