Змякчэнне санкцый у дачыненні да Беларусі выгадна для Расеі – ISW. “Канец эпохі”. Пяць высноў Мюнхенскай канферэнцыі па бяспецы, якая “ўвойдзе ў гісторыю”. Крызісны саміт ЕС і пазіцыя па Украіне. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Любое паслабленне санкцый у дачыненні да Беларусі станоўча паўплывае на расейскую эканоміку», – цытуе амерыканскі Інстытут вывучэння вайны (ISW) DW.
„ISW падкрэслівае, што Расея выдаткавала дзесяцігоддзі на інтэграцыю Беларусі ў расейскую эканоміку ў рамках праекту Саюзнай дзяржавы. “Беларусь з’яўляецца ключавым інструментам для Расеі ў яе схеме ўхілення ад санкцый, а расійская і беларуская эканомікі інтэграваны да такой ступені, што ваенныя намаганні Расіі непасрэдна выйграюць ад змякчэння санкцый ЗША адносна Беларусі”. Інстытут вывучэння вайны робіць такую выснову на фоне паведамленняў The New York Times аб тым, што ЗША рыхтуе маштабную здзелку з Менскам, у рамках якой Штаты згодныя аслабіць санкцыйны ціск на Беларусь у абмен на вызваленне вялікай колькасці палітычных зняволеных, у тым ліку вядомых шырокай грамадскасці», – перадае DW.
Сусветныя СМІ і аналітыкі ацэньваюць значэнне і прагназуюць магчымыя наступствы штогадовай глабальнай канферэнцыі па пытаннях бяспекі, якая прайшла на гэтых выходных у Мюнхене. BBC піша, што з Мюнхенскай канферэнцыі гэтага года трэба вынесці пяць галоўных урокаў.
«1. Эпоха міжнародных адносін у ранейшым выглядзе завершана. У Еўропе больш няма архітэктуры бяспекі, якая склалася пасля Другой сусветнай вайны. Амерыка ўсё гэтак жа ўваходзіць у НАТА, але аўтаматычна разлічваць на тое, што ў выпадку знешняга нападу ЗША прыйдуць ёй на дапамогу, Еўропа больш не можа.
2. Палітыка большай часткі сусветнай супольнасці ў дачыненні да Украіны кардынальна перагледжана. Заключыць здзелку, каб пакласці канец вайне ва Украіне, ЗША і Расія збіраюцца незалежна ад меркавання з гэтай нагоды самой Украіны – ды і ўсёй Еўропы ў цэлым.
3. Марнаваць больш трэба ўжо зараз. Калі краіны Еўропы маюць намер і далей стрымліваць расmучы расійскі націск, – і ў гэтым большасць экспертаў згодныя – ім давядзецца максімальна хутка нарасціць выдаткі на абарону,
4. Прамова Вэнса. Нападкі віцэ-прэзідэнта ЗША Джэй Ды Вэнс на еўрапейскую палітыку многія ўдзельнікі канферэнцыі палічылі абразлівымі. Аднак многім людзям па абодва бакі Атлантыкі выступленне Вэнса прыйшлося вельмі даспадобы, а прэзідэнт Дональд Трамп нават назваў прамову бліскучай.
5. Агульная раз’яднанасць і рост рознагалоссяў. На сённяшні дзень паміж пазіцыямі Вашынгтона і Еўропы існуюць відавочныя рознагалоссі па цэлым шэрагу пытанняў. Зрэшты, чальцы каманды Трампа нярэдка супярэчаць адзін аднаму і нават самім сабе», – паведамляе ВВС.
У Парыжы распачалая экстранная сустрэча кіраўнікоў дзяржаў і ўрадаў сямі вядучых краін Еўрасаюза. Сумесна з кіраўнікамі інстытутаў ЕС і НАТА плануецца выпрацаваць еўрапейскую пазіцыю па мірным вырашэнні вайны ва Украіне. Час не чакае, таму што ўжо на гэтым тыдні ў Саудаўскай Аравіі могуць адбыцца прамыя перамовы паміж Масквой і Вашынгтонам па гэтым пытанні. Партал публічна-прававой радыёстанцыі Český rozhlas перасцерагае ад таго, каб вырашаць лёс Украіны за яе спінай.
«Мы, чэхі, па сваім уласным гістарычным досведзе ведаем, што падобнае нічым добрым не сканчаецца. 29 верасня 1938 года дэлегацыя з Прагі сядзела ў суседнім пакоі ў Мюнхене, калі Італія, Францыя і Вялікабрытанія дамаўляліся з Гітлерам аб тым, што Чэхаславакія аддасць яму Судзецкую вобласць і запануе мір. Але не прайшло і паўгода, як Гітлер ужо быў у Пражскім Градзе, а яшчэ праз паўгода ён развязаў Другую сусветную вайну. Для таго каб не дапусціць паўтарэння гісторыі, Еўрасаюз не павінен дазволіць Расеі перамяшчаць межы. А ўдасца яму гэта толькі ў тым выпадку, калі ён згуртуе свае шэрагі. Інакш застанецца толькі паслухмяна пстрыкнуць абцасамі», – падкрэслівае чэшскае радыё.
Прэзідэнт ЗША Дональд Трамп заявіў, што ў абмен на далейшую ваенную і фінансавую дапамогу Украіна павінна даць Злучаным Штатам доступ да сваіх каштоўных карысных выкапняў. Падобную прапанову ўжо выказваў прэзідэнт Украіны Уладзімір Зяленскі ў верасні мінулага года падчас прадстаўлення свайго плана перамогі. Цяпер Зяленскі заявіў, што здзелка будзе магчымай толькі ў тым выпадку, калі Украіне будуць прадастаўлены рэальныя гарантыі бяспекі. «Так не абыходзяцца з саюзнікамі», – крытыкуе Вашынгтон украінскі партал Censor.net.
«Гэта не падтрымка – гэта новая каланізацыя. Амерыканцы бачаць Украіну не як саюзніка, а як тэрыторыю, з якой можна выціснуць максімум карысці. Яны жадаюць зрабіць нас залежнымі, выціснутымі і кантраляванымі. Іронія ў тым, што некалі ў нас была ядзерная зброя. Украіна была трэцяй ядзернай дзяржавай свету, але падпісала Будапешцкі мемарандум, аддаўшы свой арсенал у абмен на “гарантыі бяспекі” ад ЗША, Вялікабрытаніі і Расіі. І дзе гэтыя гарантыі? Расея прыйшла забіваць, Амерыка зарабляе, а Украіна ваюе за выжыванне. У нас больш няма права быць наіўнымі», – піша ўкраінскае выданне.
Агляд сусветнай прэсы падрыхтавала Вольга Сямашка.
