- Дэпутата парламента Украіны падазраюць у дзяржаўнай здрадзе з-за сувязяў з рэжымам Лукашэнкі
- Як можна ўрэгуляваць украінскі канфлікт?
- Трамп і яго каманда: перспектывы знешняй палітыкі.
Дзеючаму дэпутату Вярхоўнай рады прад’яўлена падазрэнне ў дзяржаўнай здрадзе, у тым ліку з-за сувязяў з рэжымам Аляксандра Лукашэнкі. Прозвішча парламентарыя не называецца, але выданне РБК-Украіна са спасылкай на ўласныя крыніцы і прэс-службу ГБР паведамляе, што гаворка ідзе аб Яўгену Шаўчэнку.
«Дэпутат пачаў наносіць урон абараназдольнасці і інфармацыйнай бяспецы Украіны яшчэ да пачатку поўнамаштабнага ўварвання Расеі. Сярод іншага ў 2021 годзе ён публікаваў непраўдзівую інфармацыю аб адсутнасці пагрозы ваеннага ўварвання Расеі з тэрыторыі Беларусі. Ён неаднаразова ездзіў у Беларусь, дзе сустракаўся з прадстаўнікамі дзелавых, палітычных структур і нават з самаабвешчаным прэзідэнтам краіны. Па пратэкцыі Лукашэнкі дэпутат і яго блізкія сваякі вялі актыўны бізнес з прадстаўнікамі Беларусі, у тым ліку на рынку электраэнергіі і мінеральных угнаенняў. Купляючы ў Беларусі тавары па заніжаных цэнах, яны завозілі іх ва Украіну праз іншую еўрапейскую краіну і прадавалі значна даражэй. Рэжым садзейнічання з боку беларускіх уладаў дазволіў парламентарыю за паўгода атрымаць 1,5 млн еўра чыстага прыбытку. У той жа час у Украіну Шаўчэнка змог перавесці толькі 500 тыс. еўра. Акрамя гэтага, дэпутат запісваў праграмы на ўласных каналах, даваў інтэрв’ю прарасейску настроеным блогерам і экспертам, пасля чаго гэты кантэнт распаўсюджваўся на прапагандысцкіх СМІ на тэрыторыі Расеі з мэтай стварэння на тэрыторыі краіны-агрэсара грамадскай пазіцыі, што гэта афіцыйная пазіцыя прадстаўніка ўкраінскай улады. 20 красавіка 2021 года Шаўчэнка прыязджаў у Мінск і сустракаўся з Лукашэнкам», – паведамляе ўкраінскае выданне.
Прыярытэтам для Украіны будуць гарантыі бяспекі, а не вызваленне тэрыторый. «Падчас магчымых перамоваў з Расеяй пытанне бяспекі Кіева будзе на першым плане», – піша The New York Times са спасылкай на высокапастаўленых украінскіх чыноўнікаў. Тэма тэрытарыяльнага раздзела таксама важная, але яна будзе на другім месцы. У той жа час на мінулым тыдні Уладзімір Зяленскі заявіў, што метад Трампа, які ён збіраецца выкарыстоўваць для хуткага ўрэгулявання канфлікту, азначае страты для Украіны, дый раскрытыкаваў план Трампа па хуткім спыненні канфлікту, назваўшы яго «выдатнай мадэллю для Расеі». Як адзначае The Wall Street Journal, новы амерыканскі сцэнар прадугледжвае замарожванне лініі фронту і адмову Украіны ад уступлення ў NATO як мінімум на наступныя 20 гадоў у абмен на тое, што ЗША працягваюць пастаўляць Кіеву зброю.
«Чакаецца, што ўрэгуляванне канфлікту будзе абмяркоўвацца на маючым адбыцца саміце G20 у Бразіліі.Некаторыя саюзнікі Украіны спрабуюць аказаць ціск на Кітай, звяртаючы яго ўвагу на цеснае супрацоўніцтва Расеі і Паўночнай Карэі. Суразмоўцы выдання мяркуюць, што гэтыя адносіны могуць пагражаць бяспецы ў Інда-Ціхаакіянскім рэгіёне. Чакаецца, што ў бліжэйшы час ЗША ўвядуць дадатковыя санкцыі супраць Паўночнай Карэі. Аднак Пекін захоўвае маўчанне аб актыўнасці Пхеньяна», – рэзюмуе амерыканскае выданне.
Пасля перамогі Дональда Трампа на прэзідэнцкіх выбарах у ЗША інфармацыя аб будучых прызначэннях на знешнепалітычным напрамку стала здабыткам грамадскасці. Мінабароны ўзначаліць ветэран вайны ў Афганістане і Іраку, каментатар Fox News Піт Хегсэт. Марка Рубіа стане дзяржсакратаром, а Майк Вальц — дарадцам прэзідэнта па бяспецы. Абодва апошнія кандыдаты лічацца прыхільнікамі жорсткай лініі ў адносінах да Кітая і крытыкуюць палітыку адміністрацыі Байдэна па Украіне. «Прызначэнне Марка Рубіё кіраўніком Дзярждэпартамента супярэчыць перадвыбарчым заявам Трампа аб замежнай палітыцы», – адзначае пражская Lidové noviny.
«У асобе Рубіа на вяршыню амерыканскай дыпламатыі вернецца ястраб старой школы, якому, мяркуючы па высновах аналітыкаў, не знайшлося адпаведнага месца ў шэрагах рэспубліканцаў. У рэшце рэшт партыя, здаецца, схілілася да палітыкі “Амерыка перш за ўсё” і “Кожны павінен паклапаціцца пра сябе”. Ні пра якія «бясконцыя войны» ніхто і слухаць не хацеў. А словы Марка Рубіё больш нагадваюць рыторыку Джорджа Буша-малодшага пра распаўсюд амерыканскай дэмакратыі па свеце і выразны ідэалагічны падзел на «Імперыю зла» і «Імперыю дабра», – піша чэшскае выданне.
Падчас слуханняў кандыдатаў на пасады еўракамісараў у Еўрапарламенце разгарэліся спрэчкі вакол трох кандыдатур: Рафаэле Фіта ад Італіі, Олівера Вархеі ад Венгрыі і Тэрэсы Рыберы ад Іспаніі. У першым кандыдаце шматлікіх дэпутатаў бянтэжыць яго сяброўства ў правапапулісцкай партыі Браты Італіі, другі адпраўлены “на пераздачу”, а на трэцюю іспанская кансерватыўная Народная партыя ўскладае віну за правальны крызісны менеджмент падчас нядаўняй паводкі. «Гэтая спрэчка можа стаць экзістэнцыйна важнай для фон дэр Ляйен», – лічыць рымская La Repubblica.
«Такога кшталту перацягванне каната пагражае самому існаванню новай выканаўчай улады Еўразвяза. Таму ёсць дзве прычыны. Па-першае, калі кандыдатуры Рыберы і Вархея і сапраўды будуць адхіленыя, то пачатак працы каманды фон дэр Ляйен давядзецца адкласці на нявызначаны тэрмін. Прэм’ер-міністры Орбан і Санчэс – няхай кожны па зусім розных прычынах, аднак абодва паспрабуюць выйграць час – проста для таго, каб пакараць кіраўніка Еўракамісіі. Па-другое, без сацыял-дэмакратычнага Прагрэсіўнага альянсу сацыялістаў і дэмакратаў і Зялёных утвараецца недахоп амаль у дзвесце галасоў на той момант, калі будзе праводзіцца галасаванне па пытанні даверу ўсёй калегіі. Будзе вельмі нялёгка кампенсаваць адсутнасць галасоў ад фракцый Еўрапейскія кансерватары і рэфармісты, Патрыёты і АдГ Еўропа суверэнных нацый», – піша італьянскае выданне.
Вольга Сямашка, Беларускае Радыё Рацыя
