У Польшчы чакаюць правакацый на мяжы з Беларуссю з-за нядаўніх “выбараў”. Канкурэнтаздольнасць Еўразвяза: ці правільны абраны курс? Большасць у бундэстагу – пры дапамозе АдГ? Падрабязнасці свежых матэрыялаў замежнай прэсы ў аглядзе Вольгі Сямашкі.
У Польшчы чакаюць правакацый на мяжы з Беларуссю з-за нядаўніх “выбараў”
Намеснік міністра нацыянальнай абароны Павел Залеўскі чакае, што ў сувязі з так званымі “выбарамі” ў Беларусі з’явіцца больш правакацый на мяжы. На яго думку, гэтыя дзеянні накіраваны на аслабленне дзяржавы. Пра гэта паведамляе РБК-Украіна.
“Залеўскі зазначыў, што Польшча мае справу з правакацыямі ўжо некалькі гадоў, і ў яго няма ніякіх сумневаў, што гэта правакацыі, якія служаць для паслаблення згуртаванасці польскай дзяржавы і для праверкі функцыянавання службаў, а таксама для ўмяшання ў палітычныя працэсы. “Я чакаю, што з’явіцца больш правакацый з боку Беларусі. Аднак сёння перасячы нашу мяжу больш складана. Ваенныя таксама лепш падрыхтаваны”, – дадаў Залеўскі. Нагадаем, 26 студзеня ў Рэспубліцы Беларусь праходзілі так званыя “выбары” прэзідэнта, на якіх 70-гадовы дыктатар Аляксандр Лукашэнка вылучыў сваю кандыдатуру сёмы раз. У цэлым ён кіруе краінай ужо больш за 30 гадоў. Польшча мае намер завяршыць узвядзенне сцяны на мяжы з Беларуссю да сярэдзіны 2025 года. Сцяна будуецца для спынення незаконнай міграцыі ў краіну. Напружанасць паміж Польшчай і Беларуссю ўзрасла пасля расейскага ўварвання ва Украіну. Варшава абвінавачвае Менск у наўмысным кантролі плыняў мігрантаў для ціску на ЕЗ, паколькі Беларусь прымае мігрантаў, а потым адпраўляе іх на межы з Польшчай, Літвой і Латвіяй”, – піша ўкраінскае выданне.
***
Уршуля фон дэр Ляен прадставіла план, азагалоўлены «Компасам канкурэнтаздольнасці». Пры яго дапамозе Еўракамісія мае намер павысіць канкурэнтаздольнасць еўрапейскай эканомікі. Гэтая стратэгія абапіраецца на прадстаўленую яшчэ ў мінулым верасні справаздачу былога кіраўніка ЕЦБ Марыё Драгі. “У Еўропы ёсць усё неабходнае для таго, каб выйграць у гэтай гонцы”, – растлумачыла фон дэр Ляен. Аднак не ўсе аглядальнікі падзяляюць гэты аптымізм. Выдавец варшаўскай газеты Rzeczpospolita Багуслаў Хработа не мае ілюзій.
«Ужо няма ніякіх шанцаў на тое, што Еўропа зможа нагнаць у гэтай гонцы ўвесь астатні свет. Працэс ператварэння кантынента ў свайго роду музей зайшоў ужо занадта далёка. Што застаецца? Музей пад адкрытым небам, турызм, акадэмічная адукацыя на невысокім узроўні (у гэтым у нас яшчэ нейкі час захаваецца перавага перад астатнім светам) і экалагічная сельскагаспадарчая прадукцыя. Польшча можа прапанаваць гарэлку, вэнджаныя каўбасы і маліну – пры ўмове, вядома, што будзе дастаткова рук, каб збіраць апошнюю. Цягнік сышоў, дамы і спадары, і наіўна аддавацца ілюзіі, што ёсць яшчэ шанец у яго заскочыць”, – наракае польскае выданне.
***
Германскі бундэстаг большасцю галасоў прагаласаваў за прапановы фракцыі ХДС/ХСС па ўзмацненні жорсткасці міграцыйнай палітыкі. Абавязковага юрыдычнага характару заяўка ХДС/ХСС не носіць. Сярод іншага, пакет прапанаваных мер уключае ў сябе ўвядзенне сталага кантролю на межах краіны. Вакол гэтага галасавання разгарэліся разлютаваныя дэбаты, прычынай таму – той факт, што большасць галасоў была забяспечана з дапамогай дэпутатаў ад партыі АдГ, якая ўключана Ведамствам па ахове Канстытуцыі ў спіс арганізацый, у дачыненні да якіх ёсць падазрэнне ў правым экстрэмізме. Венская Der Standard не давярае Мерцу.
«Ніколі не заключаць кааліцый з АдГ, – паверыць у праўдзівасць такіх слоў Мерца цяпер многім людзям будзе вельмі складана. І на тое ёсць падставы. Усе памятаюць, як Мерц у Давосе назваў перамовы паміж АПС і АНП у Аўстрыі “катастрофай”, а таксама тое, што яшчэ ў лістападзе ён казаў, што большасць у бундэстагу, нават самае выпадковае, ні ў якім разе не павінна фармавацца з дапамогай АдГ. Аднак, мяркуючы па ўсім, зараз гэтыя словы – проста балбатня, на якую ўжо ніхто не павінен звяртаць увагі», – адзначае аўстрыйскае выданне.
***
У Швецыі быў застрэлены антыісламскі актывіст Салван Маміка. Яму пагражала судовае разбіральніцтва па выніках шэрагу акцый па спаленні Карана. Як заявіў прэм’ер-міністр Ульф Крыстэрсан, за забойствам Мамікі могуць стаяць “сілы з-за мяжы”. Маміку ставілася ў віну цэлая серыя публічных акцый па спаленні Карана ў 2023 годзе, у выніку чаго другі Вышэйшы кіраўнік Ірана аятала Хаменеі выступіў з заявай, у якім абвінаваціў Швецыю ў тым, што яна вядзе вайну супраць ісламскага свету. Стакгольмская Expressen лічыць, што пад пагрозай знаходзяцца сама дэмакратыя і прынцып свабоды выказвання сваёй думкі.
«Тое, што паліцыя не змагла яго абараніць, – гэта правал. Калі Салван Мамік быў забіты таму, што скарыстаўся сваім правам на свабоду выказвання, то тады гэта таксама з’яўляецца нападам і на Швецыю як краіну. Незалежна ад таго, хто яго забіў – экстрэмісты, замежныя спецслужбы ці нехта іншы, гэта забойства – цяжкі ўдар па прынцыпе свабоды выказвання і практычнай магчымасці крытыкаваць іслам. Бо сілы, якія пагражалі Маміку, не абмяжоўваюцца пакараннем тых, хто іх правакуе», – падкрэслівае швецкае выданне.
Беларускае Радыё Рацыя
