Столтэнбэрг NАТО выключае здзелку «зямля ў абмен на мір» ва Украіне. У Францыі надыходзіць вырашальны тур выбараў. Вялікабрытанія выбрала лейбарыстаў: што прынясе гэтая перамога? Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
„У той час як дарадцы Трампа разважаюць над тым, каб прымусіць Украіну адмовіцца ад зямлі дзеля міру, кіраўнік альянсу адзначыў адмову Расеі выконваць папярэднія абяцанні аб спыненні агню», – піша еўрапейскі штотыднёвік Politico.
„Генэральны кіраўнік NATO Енс Столтэнбэрг у пятніцу адбіў заклікі ЗША прымусіць Украіну адмовіцца ад зямлі або будучага сяброўства ў NATO у абмен на спыненне вайны расейскім лідарам Уладзімірам Пуціным. «У нас не можа быць Менск-3», — заявіў генеральны сакратар NATO на прэс-канферэнцыі, маючы на ўвазе ранейшыя правалы мірных пагадненняў паміж Масквой і Кіевам. «Няма ніякіх прыкмет таго, што Пуцін… гатовы весці мірныя перамовы». Два менскія пагадненні — падпісаныя ў 2014 і 2015 гадах пры актыўным удзеле Германіі і Францыі — былі накіраваны на спыненне першага ўварвання Расеі ва Украіну ў 2014 годзе. У той год яна незаконна анексавала Крым, а затым развязала канфлікты ва ўсходняй Украіне, выкарыстоўваючы сумесь расейскай мовы, агітатараў і войскаў плюс незадаволеных мясцовых жыхароў. Менскае пагадненне ўвяло спыненне агню і дазволіла самакіраванне ў частках усходняй Украіны, але ў Кіеве разглядалі гэта як ушчыльненне ўплыву Расеі на канстытуцыйны лад Украіны. Гэта ніколі не было цалкам рэалізавана.
Расея адмовілася ад пагаднення ў 2022 годзе, калі пачала поўнамаштабнае ўварванне ва Украіну. Кажуць, што саюзнікі і дарадцы Дональда Трампа, меркаванага кандыдата ў прэзідэнты ад Рэспубліканскай партыі, распрацоўваюць планы прымусіць Кіеў адмовіцца ад намаганняў па адваяванні тэрыторый, якія кантралююцца Расеяй, і ануляваць сваё будучае сяброўства ў NATO ў абмен на мірнае пагадненне з Расеяй», – піша еўрапейскае выданне.
У першым туры парламенцкіх выбараў у Францыі на першае месца выйшла правая папулісцкая партыя Нацыянальнае аб’яднанне. Напярэдадні другога тура выбараў, які пройдзе ў нядзелю, левы альянс, які заняў другое месца, Новы народны фронт і лагер Макрона, які атрымаў толькі трэцяе месца, ужо адклікалі звыш 200 сваіх кандыдатаў, з тым каб павысіць шанцы адзін аднаго ў гонцы супраць Нацыянальнага аб’яднання. Парыжская Les Echos папярэджвае аб тым, якімі наступствамі можа абярнуцца трыумф правых.
«Ці ўбачым мы канфрантацыю з інстытутамі ЕЗ і Еўрапейскім цэнтральным банкам, якая прывядзе да агульнага крызісу еўразоны? Не выключана. Гэта вялікая макраэканамічная рызыка. Іншым магчымым сцэнаром можа стаць “меланізацыя” Нацыянальнага аб’яднання: гэта значыць амаль поўны адыход ад эканамічнай праграмы і засяроджванне ўвагі на ідэалагічных пазіцыях. Але Мелані ўстала на бок Украіны, а партыя Нацыянальнае аб’яднанне атрымлівала ад Расіі фінансаванне. З іншага боку, Італія атрымлівае вельмі вялікія сродкі ад Еўразвяза, што абмяжоўвае яе патэнцыйныя трэнні з Бруселем. Калі Францыяй будзе кіраваць Нацыянальнае аб’яднанне, то ўзнікне вялікая рызыка таго, што цень Пуціна распаўзецца па ўсёй Еўропе, а Еўрасаюз стане недзеяздольным», – папярэджвае французскае выданне.
Перамогу на парламенцкіх выбарах у Вялікабрытаніі атрымала Лейбарысцкая партыя Кіра Стармера, якая з вялікім адрывам абагнала сваіх канкурэнтаў. Стармер паабяцаў краіне «перамены». Па выніках падліку амаль усіх галасоў лейбарысты атрымліваюць 412 з 650 месцаў у Палаце абшчын, у той час як торы панеслі цяжкія страты і ў іх застаўся толькі 121 партфель. За торы ідуць ліберал-дэмакраты, на чацвёртым месцы – правая папулісцкая партыя Рэфармаваць Злучанае Каралеўства. «У некаторых аспектах знешняй палітыкі шмат што зменіцца», – такое меркаванне выказвае турынская La Stampa. «Паміж лейбарыстамі і кансерватарамі будзе пераемнасць у пазіцыі па вайне ва Украіне і ў дачыненні да Расіі. Гэтая пазіцыя, як ні дзіўна, на палітычным узроўні амаль не абмяркоўваецца. Аднак Стармер будзе адчуваць на сабе ціск у плане ўзмацнення крытыкі ў адрас Ізраіля, ад яго будуць патрабаваць больш рэзкіх выказванняў у параўнанні з Сунакам, і перш за ўсё, у сілу таго, што Стармер працаваў адвакатам у галіне абароны правоў чалавека. Гэта стане першай праверкай наконт таго, ці гатовы новы лейбарысцкі ўрад да большага адмежавання ад амерыканскай палітыкі. Адназначна можна сказаць, што лейбарысты адхіліцца ад лініі кансерватараў у дачыненні да Еўразвяза і нелегальнай іміграцыі: тут будзе назірацца змякчэнне пазіцый», – адзначае італьянскае выданне.
УЕФА прыняла прынцыповае рашэнне аб дыскваліфікацыі іграка зборнай Турцыі Мерыха Дэмірала – героя адной восьмай фіналу супраць Аўстрыі. Прычына: пераможны гол у вароты Аўстрыі Дэмірал адсвяткаваў знакам «Шэрых ваўкоў» – аднайменнага турэцкага праваэкстрэмісцкага, фактычна неафашысцкага руху. «Палітычныя выказванні да нейкай ступені памяркоўныя, але жэст Дэмірала перайшоў усе межы», – лічыць гамбургскі штотыднёвік Der Spiegel.
«Ва УЕФА ёсць дакладныя правілы, якія забараняюць палітычныя заявы ў рамках футбольнага матчу. Можна лічыць гэта правільным ці няправільным – як заўгодна. Падобныя дэбаты ўжо вяліся на мінулым чэмпіянаце Еўропы, калі размова ішла аб вясёлкавай сімволіцы перад гульнёй паміж зборнымі Германіі і Венгрыі. Тагачасная забарона была вельмі спрэчнай, у тым ліку таму, што можна сказаць: вясёлкавы сцяг – гэта не выразна выяўленае палітычнае выказванне, але сімвал універсальных каштоўнасцяў. УЕФА палічыла па-іншаму. Менавіта таму яна зараз не мае права не пакараць турэцкага гульца. У адваротным выпадку яна падарве свой аўтарытэт», – папярэджвае нямецкае выданне.
Беларускае Радыё Рацыя
