Усё больш дзяцей з рэгіёнаў Украіны, якія кантралююцца Расеяй, прыязджаюць у Беларусь. 2024 – год выбараў «Паветраны шэнген» для Румыніі і Балгарыі. Падрабязнасці свежых матэрыялаў замежнай прэсы.
«Дыктатар Беларусі напярэдадні Новага года наведаў арганізаваную ўрадам сустрэчу з дзецьмі, прывезенымі з кантраляваных Расеяй раёнаў Украіны, адкрыта кідаючы выклік міжнароднаму абурэнню датычнасцю яго краіны да дэпартацыі ўкраінскіх дзяцей Масквой», – заўважае амерыканская газета Stars and Stripes.
«Выступаючы на мерапрыемстве з нагоды прыезду новай групы ўкраінскіх дзяцей напярэдадні навагодніх святаў, Лукашэнка паабяцаў «абняць гэтых дзяцей, прывезці іх да нас у дом, сагрэць і зрабіць іх дзяцінства больш шчаслівым». Колькі ўкраінскіх дзяцей прывезена ў краіну, беларускія чыноўнікі не паведамляюць. Беларуская апазіцыя заклікала Міжнародны крымінальны суд прыцягнуць Лукашэнку і яго чыноўнікаў да адказнасці за іх удзел у незаконнай перадачы ўкраінскіх дзяцей. Раней у снежні Міжнародны Чырвоны Крыж прыпыніў беларускае аддзяленне арганізацыі пасля таго, як яго кіраўнік Дзмітрый Шаўцоў выклікаў міжнароднае абурэнне тым, што пахваліўся тым, што ён актыўна перапраўляе ўкраінскіх дзяцей з тэрыторый, кантраляваных Расеяй, у Беларусь. Шаўцоў назваў гэты крок «абсалютна палітызаваным», заявіўшы, што ўкраінскія дзеці, якія прыехалі ў Беларусь «на аздараўленне», шчасна вярнуліся дадому. Беларусь была найбліжэйшым саюзнікам Масквы з пачатку расейскага ўварвання ва Украіну ў лютым 2022 года, калі Лукашэнка дазволіў Крамлю выкарыстоўваць тэрыторыю сваёй краіны для ўварвання ва Украіну. Расея таксама размясціла ў Беларусі частку сваёй тактычнай ядзернай зброі», – нагадвае амерыканскае выданне.
Сёлета ў многіх краінах свету пройдуць выбары. На коне стаіць палітычная будучыня. Аглядальнікі з трывогай сочаць за сітуацыяй і разважаюць над тым, чым галасаванні – ад Вялікабрытаніі да ЗША, Расеі, Індыі і Тайваня – могуць абярнуцца для Еўропы і ўсяго свету. Нягледзячы на ўсю небяспеку, якая паходзіць ад папулістаў, мюнхенская газета Süddeutsche Zeitung спадзяецца на пазітыўны патэнцыял выбараў.
«Наколькі вызваляючай і натхняльнай моцай могуць стаць выбары, відаць на прыкладзе Польшчы. Падобныя моманты вызвалення рэдкія ў грамадстве, у якім пануе дэмакратыя, але яны валодаюць вялізнай прыцягальнасцю. Хто ведае, ці не стануць намінальныя выбары ў Беларусі, Іране ці нават Расеі той іскрай, якая падорыць надзею? Паказальна тое, што нават такія дыктатары, як Уладзімір Пуцін, не супраць пагрэцца ля камяльку нібыта дэмакратычных выбараў. Выбары ніколі не былі такія папулярныя, як у 2024 годзе, але і спакуса папулізму ніколі не была такой вялікай», – канстатуе нямецкае выданне.
Прапанова Аўстрыі была прынята Бруселем: з канца сакавіка 2024 года Еўразвяз адменіць праверку асабістых дакументаў для падарожнікаў з Румыніі і Балгарыі. Але гэта датычыцца толькі аэрапортаў і марскіх межаў. Абедзве краіны павінны будуць у сваю чаргу нарасціць свае намаганні па абароне знешніх граніц ЕЗ. На гэтыя мэты ім будзе выдзелена дадатковае фінансаванне. Ці можна разглядаць гэта як разумны і прымальны крок на шляху да поўнага ўступлення ў Шэнген? «Перашкоды на шляху да Шэнгена нікуды не падзеліся», – канстатуе руымнскі партал republica.ro.
«Рэальная праблема мае эканамічны характар і вырашыць яе можна будзе толькі тады, калі наша краіна рэальна ўступіць у зону Шэнгена. Уступленне ў Шэнген «па паветры» мала дапаможа Румыніі, хіба што палітыкі будуць выкарыстоўваць гэты факт у сваіх папулісцкіх мэтах. Для тых, хто не ў курсе: транспартныя кампаніі губляюць два мільярды еўра штогод з-за таго, што Румынія не ўваходзіць у Шэнген, а гэта складае каля 20 працэнтаў іх абароту! Мы павінны разумець наступнае: існуе вялікая верагоднасць таго, што на фоне цяперашняга рашэння пытанне нашага рэальнага ўступлення ў Шэнген можа знікнуць са спісу прыярытэтаў ЕЗ», – папярэджвае румынскае выданне.
14 студзеня 2024 года каралева Даніі Маргрэтэ II складзе з сябе паўнамоцтвы манарха. Гэты дзень выбраны не выпадкова: на пасад яна ўзышла роўна 52 гады таму, 14 студзеня 1972 года. На сённяшні дзень Маргрэтэ II з’яўляецца самым доўгакіруючым манархам Еўропы. Пасля сыходу каралевы трон пяройдзе да яе сына Фрыдэрыка. Аб рашэнні адрачыся ад пасаду каралева аб’явіла ў сваім навагоднім звароце да нацыі ў снежні 2023 года. Прэса аддае даніну павагі, якая сыходзіць каралеве і звяртае погляды да яе спадчынніку. «Каралева Маргрэтэ II верай і праўдай служыла сваёй краіне», – піша лонданская газета The Times.
«Яе заява аб адрачэнні ад пасаду, якое транслявалася па тэлебачанні, заспела краіну знянацку і выклікала ўсеагульнае шкадаванне – роўна як і прызнанне яе заслуг, бо за гады свайго кіравання яна здолела ператварыць адну з самых чапурыстых і закасцянелых манархій Еўропы ў такую, у якой каралеўская сям’я нефармальна мае зносіны з тэлебачаннем, дае інтэрв’ю, здзяйсняе мноства спантанных візітаў, публікуе навіны ў Instagram і знаходзіць водгук у грамадзян з усіх слаёў грамадства. Каралева Маргрэтэ нават у свае 83 гады стварае ўражанне сучаснага чалавека. Яна зусім нядаўна кінула курыць па 60 цыгарэт у дзень. Яна працавала мастаком па касцюмах і ілюстратарам кніг Толкіена. Яна змяніла імідж сваёй краіны ў лепшы бок, і заслужыла свой адпачынак», – адзначае брытанскае выданне.
Агляд сусветнай прэсы падрыхтавала Вольга Сямашка
Фота: news.pn/uk
