Фота: דובר צה״ל דניאל הגרי – Daniel Hagari / Х
Членства Беларусі ў ШАС — дрэнная навіна для суседзяў па ЕЗ. Удар па Галанскіх вышынях: ці адкрыецца другі фронт? Расце рэйтынг адабрэння Камалы Харыс. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Лукашэнка амаль напэўна выкарыстае ўступленне сваёй краіны ў шматбаковую еўразійскую групоўку як падставу для таго, каб працягваць завальваць Польшчу і Прыбалтыку міграцыйнымі атакамі. На жаль, самым істотным вынікам двухдзённай канферэнцыі Шанхайскай арганізацыі супрацоўніцтва (ШАС) стала тое, што ў яе шэрагі ўступіла Беларусь — міжнародная парыя і прызнаная ЗША дзяржава-спонсар гандлю людзьмі — у дзень абвяшчэння незалежнасці і ўсяго за некалькі тыдняў да святкавання Лукашэнкам трох дзесяцігоддзяў у стырна», – піша еўрапейскае выданне Emerging-europe.
«Санкцыйны наступ на Беларусь аказаўся палкай з двума канцамі. У той час як агульнаеўрапейскае гандлёвае эмбарга разам з забаронай на транспарт разграміла яго арыентаваную на экспарт эканоміку і прымусіла Лукашэнку залізваць раны, то цяпер ён есць з рук Пуціна і залежыць ад шчодрасці Крамля для самазахавання. Лукашэнка шмат у чым з’яўляецца архітэктарам уласнай ізаляцыі і яму трэба сур’ёзна задумацца. Лукашэнка разлічвае на прыбытковы кантрольны канцэрт, падобны да пагаднення аб уцекачах з Турцыяй у 2016 годзе, які дазволіў прэзідэнту Рэджэпу Таіпу Эрдагану вымагаць і рабаваць ЕЗ ўсляпую ў абмен на спыненне адтоку мільёнаў сірыйскіх асоб, якія шукаюць прытулку ў Еўропе. Назапасіўшы крытычную масу патэнцыйных умяшальнікаў на тэрыторыі Беларусі, былы кіраўнік калгаса плануе апошнім кіданнем кубіка атрымаць падобныя рычагі ўплыву на Брусель і паўтарыць майстэрства свайго турэцкага калегі», – папярэджвае еўрапейскае выданне.
Ізраіль і ЗША ўсклалі адказнасць за ракетны ўдар па футбольным полі на Галанскіх вышынях на ліванскую Хезбалу. У выніку ўдару ў суботу загінула як мінімум дванаццаць падлеткаў і маладых людзей. Ваенны кабінет Ізраіля прадаставіў прэм’ер-міністру Нетаньяху свабоду дзеянняў. ЗША спрабуюць выступіць пасярэднікам паміж Ізраілем і Ліванам, каб пазбегнуць эскалацыі. «Ізраіль прымушаюць да ўварвання», – папярэджвае рымская La Repubblica.
«Міністр абароны Галант лічыць, што неабходна абавязкова раз і назаўжды пазбавіцца ад пагрозы пад назвай Хезбала, і частка войска яго падтрымлівае. Яны прытрымліваюцца таго меркавання, што ліванскія саюзнікі Ірана пераследуюць паспяховую стратэгію, ведучы гульню на знясіленне яўрэйскай дзяржавы. У рэшце рэшт гэты манеўр разлічаны на тое, каб прымусіць Ізраіль уварвацца ў Ліван, завабіць яго пад крыжаваны агонь з варожых пазіцый – і такім чынам заручыцца салідарнасцю арабскага свету», – адзначае італьянскае выданне.
Амерыка ўступае ў самы гарачы этап перадвыбарнай гонкі – да галасавання засталося 100 дзён. Аналітыкі падлічваюць грашовыя ўнёскі за абодвух кандыдатаў. Усяго за тыдзень пасля вылучэння Камала Харыс атрымала $200 млн. Гэта толькі крыху менш, чым сабраў Джо Байдэн за апошнія тры месяцы сваёй кампаніі. Апытанні паказваюць, што пакуль выбаршчыкі не вызначыліся ў сваіх сімпатыях, а самі прэтэндэнты на авальны кабінет узмацняюць нападкі адзін на аднаго.
«З’яўленне Харыс не толькі ажывіла прэзідэнцкую гонку, але і сутыкнула амерыканцаў з «эфектам падвойнага расчаравання». Калі раней выбаршчыкі, якія адчувалі непрыязнасць да абодвух кандыдатаў, схіляліся да Байдэна толькі з-за страху перад Трампам, але ў цэлым пра іх абодвух было ўсё зразумела, то зараз Камала Харыс ацэньваецца як чалавек, пра якога шмат невядома. І гэты новы старт кампаніі ў Дэмакратычнай партыі не вырашае праблему так званых падвойных ненавіснікаў – гэта тыя выбаршчыкі, якім не падабаюцца абодва кандыдаты. Тым не менш рэйтынг адабрэння Камалы Харыс вырас да 45% з 35% тыдзень таму. Рэйтынг яе суперніка-рэспубліканца ўпаў да 36 працэнтаў. Адразу пасля замаху Трампу сімпатызавалі 40% апытаных», – нагадвае амерыканскае выданне Bloomberg.
Праваслаўная царква ў Румыніі мае намер кананізаваць трох спачылых багасловаў і святароў – Думітру Стэнілааэ, Іларыёна Фелю і Іліі Лэкэтуша, якія сталі ахвярамі камуністычнага рэжыму. Даследчыкі Халакосту крытыкуюць той факт, што ў 30-я і 40-я гады ХХ стагоддзя гэтыя святары адкрыта выступалі за румынскіх фашыстаў, якія ўчынялі пагромы яўрэяў. І няма ніякіх пісьмовых сведчанняў таго, што гэтыя трое пасля шкадавалі аб сваіх паводзінах. Бухарэсцкая Libertatea выступае за асвету.
«На жаль, бясспрэчна, што частка духавенства ў міжваенны перыяд падтрымлівала вар’яцтва К. З. Кадрану – лідара румынскага фашысцкага легіянерскага руху і непазбежна ўпадала ў антысемітызм. Застаецца дачакацца большай колькасці дэталяў і доказаў таго, наколькі гэтыя людзі, выжыўшы пасля пекла ГУЛАГа, вылечыліся ад памылак сваёй маладосці. Дыскусія аб гэтым не церпіць адкладу таму, што сёння на палітычнай арэне Румыніі ў нас маецца як мінімум адна (антыеўрапейская і нацыяналістычная) партыя, якая карыстаючыся ідэалагічнай узурпацыяй праваслаўнай ідэі, мае намер выцягнуць на свет божы дэманаў, якія пераследвалі Румынію ў міжваенны перыяд», – піша румынскае выданне.
Беларускае Радыё Рацыя
