Праваабаронцы папрасілі вярхоўнага камісара ААН наведаць Менск – у абмен на вызваленне Алеся Бяляцкага. Размова Трампа з Пуціным: ці чакаць спынення агню? Турцыя-ЕЗ: новае збліжэнне. Падрабязнасці свежых матэрыялаў замежнай прэсы ў аглядзе Вольгі Сямашкі.
«Праваабаронцы “Вясны” звярнуліся да вярхоўнага камісара ААН Фолькера Цюрка з просьбай прыняць прапанову міністра замежных спраў РБ Максіма Рыжанкова, які 26 лютага ў Жэневе прапанаваў вярхоўнаму камісару здзейсніць візіт у Менск”, – перадае DW.
«Праваабаронцы заклікалі Фолькера Цюрка прыняць запрашэнне і наведаць Беларусь як мага хутчэй. Аднак, лічаць у “Вясне”, спачатку неабходна пераканацца ў сур’ёзнасці намераў беларускага боку, і ў якасці ўмовы для візіту вярхоўнага камісара яны заклікалі выставіць вызваленне лаўрэата Нобелеўскай прэміі міру 2022 года Алеся Бяляцкага. Зварот быў перададзены вярхоўнаму камісару праз спецыяльнага дакладчыка ААН па пытанні аб становішчы ў галіне правоў чалавека ў Беларусі Нільса Муйжніекса. Той, як адзначаюць праваабаронцы, ужо перадаў ліст вярхоўнаму камісару», – перадае DW.
***
Прэзідэнт Расеі Уладзімір Пуцін правёў тэлефонную размову з прэзідэнтам ЗША Дональдам Трампам; яна доўжылася каля дзвюх з паловай гадзін – ужо другую па ліку пасля ўступлення Трампа ў пасаду. Як заяўлена, гаворка ішла узгодненай з Украінай прапанове Злучаных Штатаў аб папярэднім 30-дзённым спыненні агню. Аглядальнікі абмяркоўваюць элементы патэнцыйнай дамовы і магчымыя выклікі для Еўропы і Украіны. «Усе астатнія дзяржавы могуць толькі назіраць за тым, што адбываецца, і спадзявацца на лепшае», – лаканічна адзначае турынская La Stampa.
«Расейска-ўкраінская вайна адкінула свет на паўстагоддзя таму. Сённяшняя тэлефонная размова – першая гутарка гэтай новай халоднай вайны, якая ў любы момант можа стаць не такой і халоднай. Абодва гіганты сумесна шукаюць выйсце, з тым каб аднавіць раўнавагу ў свеце і ўхіліць паміж сабой небяспечныя і цяжкія “дэталі”. Іншыя краіны, зусім не гіганты – Украіна і “Еўропа жадаючых і немагутных” – стоўпіліся непадалёк і спадзяюцца на тое, што прынятыя рашэнні не лягуць на іх плечы цяжкім грузам», -піша італьянскае выданне.
***
У сувязі з крызісам у адносінах з ЗША Еўразвяз шукае новыя шляхі ўзмацнення сваёй абароназдольнасці. Адной з магчымасцяў з’яўляецца Турцыя з яе магутным войскам і абароннай прамысловасцю. Паводле паведамленняў, генеральны сакратар НАТА Марк Рутэ ўжо заклікаў краіны Еўразвяза да супрацоўніцтва з Эрдаганам. Той жа, у сваю чаргу, каторы раз уздымае пытанне аб сяброўстве Турцыі ў ЕЗ, называючы яго “стратэгічным прыярытэтам”. Ці намячаецца ў гэтых адносінах “буйная здзелка”? «Еўрапейцы разумеюць, што павінны яшчэ шмат чаго зрабіць для ўмацавання сваёй абароны», – адзначае амстэрдамская De Volkskrant.
«У кароткатэрміновай перспектыве з-за вайны ва Украіне, а ў доўгатэрміновай – з прычыны таго, што неабходна выбудаваць еўрапейскую структуру абароны, паколькі нельга больш слепа спадзявацца на ЗША. У абодвух адносінах туркі нам вельмі патрэбны. Эрдаган паступіў вельмі разумна, увязаўшы пытанне еўрапейскай абароны з іншым пытаннем, а менавіта – аб уступленні Турцыі ў Еўрапейскі звяз. За кошт супрацоўніцтва ў сферы абароны Турцыя спадзяецца зноў унесці дынаміку ў перамовы аб мытным саюзе, змякчэнні візавага рэжыму і ў канчатковым выніку – аб сяброўстве ў ЕЗ. Атмасфера зараз для гэтага самая што ні на ёсць прыдатная», – падкрэслівае нідэрландскае выданне.
***
«Міністр па справах Еўразьвязу Адам Шлапка заявіў, што Польшча мае намер падтрымаць ініцыятыву Чэхіі па пошуку фінансавання Еўразвязам для Радыё Свабодная Эўропа/Радыё Свабода (RFE/RL). Гэтую ідэю да гэтага часу падтрымалі сем дзяржаў-чальцоў, у тым ліку краіны Балтыі, Аўстрыя, Германія, Бельгія і Швецыя», – піша Wydarzenia.interia.pl.
«Ініцыятыву мае намер падтрымаць і Польшча. — Як выконваючы абавязкі старшынства мы ўнеслі ў парадак дня сённяшняй сустрэчы абмеркаванне Радыё Свабода. Гэта добрая і патрэбная ініцыятыва, Польшча мае намер яе падтрымаць – сказаў Адам Шлапка. Ён адзначыў, што гэта толькі першы крок, і перад тым, як можна будзе рабіць нейкія канкрэтныя дзеянні, патрэбна згода Еўракамісіі. Міністр падкрэсліў, што існаванне такіх станцый, як Радыё Свабодная Еўропа, важнае, таму што ЕЗ мае патрэбу ў надзейных крыніцах інфармацыі. — Кожны дзень мы змагаемся з масавай дэзінфармацыяй. Інфармацыйная бяспека з’яўляецца адным з прыярытэтаў польскага старшынства (Рады Еўразвязу), таму існаванне надзейных крыніц інфармацыі, грунтоўных і заснаваных на фактах, надзвычай важнае. Прэзідэнт ЗША Дональд Трамп у пятніцу падпісаў распараджэнне аб максімальных абмежаваннях дзейнасці і персаналу Агенцтва ЗША па глябальных СМІ, якое адказвае за СМІ за мяжой, у тым ліку Радыё Свабода/Радыё Свабода і Голас Амерыкі (Голас Амерыкі). Усе журналісты «Голасу Амерыкі» былі адпраўленыя ў прымусовы адпачынак, а Радыё Свабода паведамілі пра спыненне фінансавання. Радыё Свабода і «Голас Амерыкі» — гэта больш за 2 тысячы супрацоўнікаў, бюджэт 270 мільёнаў даляраў і трансляцыя на 49 мовах для больш чым 360 мільёнаў слухачоў штотыдзень. «Голас Амерыкі» дзейнічаў з 1942 года, а Радыё Свабода — з 1950 года», – піша польскае выданне.
Беларускае Радыё Рацыя
