- Новы пакет санкцыяў супраць Беларусі прынялі за некалькі дзён
- Францыя пасля першага тура выбараў
- Выбары прэзідэнта ў Іране
«Новы пакет санкцый у дачыненні да Беларусі за ўцягнутасць у агрэсію РФ супраць Украіны Еўрасаюзу не ўдавалася прыняць паўтара года – са студзеня 2023-га. Раптам у канцы чэрвеня пытанне было тэрмінова вынесена на парадак дня, і пакет прынялі літаральна на працягу некалькіх дзён. Як так выйшла?», – задаецца пытаннем DW.
«Пасля таго, як нам удалося дамовіцца па 14-м пакеце санкцый у дачыненні да Расеі, мы паабяцалі старанна працаваць у апошнія дні нашага старшынства ў Савеце ЕС і над беларускім пакетам», – кажа пастаянны прадстаўнік Бельгіі пры ЕС Вільем ван дэ Вордэ. – Раптам пазіцыі краін на перамовах змяніліся, і ў нас з’явілася магчымасць. Па ягоных словах, краіны-сябры Еўразвяза зразумелі, што гэта той шанец, за які трэба хапацца, і што акно магчымасцяў у канцы бельгійскага старшынства будзе вельмі маленькім, таму трэба дзейнічаць хутка, не губляючы ні дня. Як стала вядома DW, пазіцыя краін Балтыі па санкцыях у дачыненні да Беларусі была вельмі жорсткай, але ім прыйшлося пайсці на кампраміс, як і краінам, якія экспартуюць свае тавары ў Беларусь. Так, напрыклад, у пакет удалося ўключыць забарону на ўвоз нямецкіх аўтамабіляў падвойнага прызначэння, гэта значыць прыдатных для фронту. У Венгрыі таксама былі сякія-такія пярэчанні, але і ёй прыйшлося паступіцца парай пунктаў. Таксама крыніцы кажуць, што першапачаткова санкцыі супраць Беларусі павінны былі быць часткай 14 пакета мер у дачыненні да РФ, і толькі аддзяліўшы іх, удалося дабіцца прагрэсу ў абедзвюх працэдурах», – паведамляе DW.
У першым туры парламенцкіх выбараў у Францыі на першае месца выйшлі правая папулісцкая партыя Нацыянальнае абʼяднанне і яе саюзнікі. Яны набралі каля 33 працэнтаў галасоў. Напярэдадні другога тура выбараў у будучую нядзелю левы альянс, які заняў другое месца, Новы народны фронт і лагер Макрона, які атрымаў толькі трэцяе месца, ужо адклікалі сваіх кандыдатаў, з тым каб павялічыць шанцы адзін аднаго ў гонцы супраць Нацыянальнага абʼяднання. «Францыя апынулася загнанай у кут», – робіць несуцяшальную выснову парыжская Le Figaro.
«Калі выбары праходзяць у два туры, вынікі першага раўнда яшчэ ні пра што не гавораць. Яшчэ можа шмат адбыцца, і час паміж двума турамі будзе мець вырашальнае значэнне. Тым не менш, усё паказвае на тое, што рамкі ўжо ўстаноўлены: палярызацыя, сведчаннем якой стаў галавакружны рост колькасці двубояў паміж Нацыянальным абʼяднаннем і Непакоранай Францыяй у складзе Новага нацыянальнага фронту або іх магчымае супрацьстаянне ў другім туры выбараў з трыма ўдзельнікамі, быццам ударам сякеры афармляе радыкальна новы палітычны ландшафт. Гэта прыводзіць да грамадскіх лідараў, а таксама выбаршчыкаў у мукі палітычнай і маральнай дылемы. Гэта – у прамым сэнсе слова трагедыя: лёс прапануе нам толькі дрэнныя рашэнні», – адзначае французскае выданне.
Падчас першага тура прэзідэнцкіх выбараў у Іране большасць галасоў – каля 42,5 працэнта – атрымаў адзіны прадстаўнік адносна ўмеранага лагера Масуд Пезешкіан. На другім месцы – каршак Саід Джалілі, які набраў 38,7 адсотка. Другі тур галасавання адбудзецца 5 ліпеня. Нагадаем, што ў траўні папярэдні прэзідэнт Ібрахім Раісі загінуў у выніку крушэння верталёта. «Глядзець з боку і спадзявацца – гэтага мала», – лічыць гамбургскі штотыднёвік Der Spiegel.
«Іранскую сістэму нельга змяніць знутры – неабходны ціск звонку. Той, хто жадае паспрыяць зменам, павінен узяць на мушку эліту Ісламскай Рэспублікі. Пры гэтым недастаткова проста ўводзіць санкцыі – іх трэба дакладна ажыццяўляць. Млявы рэжым санкцый, уведзеных Захадам, у Іране ўспрымаюць як слабасць. У Ісламскай Рэспубліцы найперш разумеюць палітыку сілы. Калі падчас галасавання 5 ліпеня значная частка іранцаў і іранак зноў не прыйдзе на ўчасткі – і тым самым выкажа свой пратэст супраць рэжыму, Захад павінен пачуць гэты сігнал – і аказаць падтрымку жыхарам краіны», – заклікае нямецкае выданне.
У Злучаных Штатах прайшлі першыя тэледэбаты кандыдатаў на пасаду прэзідэнта ЗША Джо Байдэна і Дональда Трампа. Супернікі не скупіліся на нападкі ў адрас адзін аднаго. Еўрапейская прэса наракае, што Байдэн падчас гэтага двубоя выглядаў вельмі непераканаўчым. «Хіба Байдэну даўно час на пенсію», – хвалюецца заграбская Jutarnji list.
«Горш за ўсё тое, што ўсё гэта было вядома яшчэ год таму, калі ў дэмакратаў было яшчэ дастаткова часу для таго, каб абраць кандыдата, здольнага даць адпор злоснаму Трампу. Але ніхто не пажадаў пайсці насуперак байдэнаўскаму істэблішменту – і абзавесціся цэтлікам ʼздраднікаʼ. Такое стаўленне да справы і прывяло да катастрофы, сведкамі якой мы з вамі зараз зʼяўляемся. Дональд Трамп – фашызоідны гнюс, які ўяўляе пагрозу для амерыканскай дэмакратыі. Яго перамога прывядзе да кепскіх наступстваў, ад Вашынгтона да Кіева і Газы – а ўсё толькі таму, што дэмакраты не знайшлі ў сабе сіл сказаць Байдэну: Джо, дзякуй табе за ўсё, але прыйшоў час для новага пакалення», – піша харвацкае выданне.
Вольга Сямашка, Беларускае Радыё Рацыя
