Польшча падоўжыла буферную зону на беларускай мяжы пасля скарачэння нелегальных перасячэнняў на 64%. Нямеччына ўводзіць памежны кантроль. Перамога Украіны абыдзецца Захаду ў сотні мільярдаў даляраў. Падрабязнасці свежых матэрыялаў замежнай прэсы.
Польшча працягнула буферную зону на мяжы з Беларуссю яшчэ на тры месяцы. «Міністэрства ўнутраных спраў паведамляе, што гэтая мера ўжо прывяла да зніжэння на 64% колькасці спроб нелегальных перасячэнняў мігрантамі, якія ў асноўным з Блізкага Усходу, Азіі і Афрыкі», – піша міжнароднае выданне The Notes from Poland.
„Буферная зона была ўведзена 13 чэрвеня ў адказ на ўсплёск спроб перасячэння мігрантамі, якіх заахвочваюць і дапамагаюць улады Беларусі, а таксама ў адказ на рост агрэсіі ў дачыненні да польскіх памежнікаў, што ў адным выпадку прывяло да гібелі салдат. Гэтая мера, падобная да той, якая была прынята раней пры былым урадзе ў 2021 годзе, забараняе пабочным асобам набліжацца на 200 метраў ад польскага боку мяжы ў некаторых месцах і да двух кіламетраў у іншых. Гэта заклікана палегчыць працу памежнікаў і перашкодзіць перавозчыкам людзей. У аўторак міністэрства ўнутраных спраў абвясціла, што з серады зона будзе працягнута на другі перыяд у 90 дзён. Буферную зону раскрытыкавалі як польскі камісар па правах чалавека, так і камісар Рады Еўропы па правах чалавека, якія сцвярджаюць, што яна перашкаджае доступу ў зону для СМІ і гуманітарных груп. У заяве МУС у аўторак гаворыцца, што за першыя 90 дзён існавання зоны памежнікі выдалі 158 дазволаў на праезд людзей, у тым ліку 97 для прадстаўнікоў СМІ і 23 для міжнародных НДА. Таксама за гэты перыяд быў затрыманы 71 чалавек, які займаўся кантрабандай. Большасць тых, хто ўязджае ў Польшчу праз беларускую мяжу, накіроўваецца далей на захад, у прыватнасці ў Германію», – нагадвае міжнароднае выданне.
З наступнага тыдня Нямеччына мае намер увесці кантроль на ўсіх сваіх межах. Міністр унутраных спраў Нэнсі Фезер абгрунтавала гэтае рашэнне імкненнем абмежаваць нерэгулюемую міграцыю і ўзмацніць абарону ад тэрарызму і трансгранічнай злачыннасці. Акрамя таго, стануць магчымыя “адмовы ва ўездзе, якія адпавядаюць еўрапейскаму заканадаўству”. Прэм’ер-міністр Польшчы Дональд Туск учора асудзіў рашэнне Германіі як «непрымальнае». Ён заклікаў Берлін замест гэтага дапамагчы Польшчы ў яе намаганнях па прадухіленні нелегальнай міграцыі на ўсходніх межах ЕЗ. Варшаўскі штотыднёвік Tygodnik Powszechny разважае:
«Асновы палітыкі, якую Ангела Меркель праводзіла цягам апошніх 20 гадоў, цяпер ляжаць у руінах. Адносіны з Расеяй завяршыліся ў дзень уварвання Расеі ва Украіну. Цяперашні старшыня ХДС Фрыдрых Мерц мае намер закрыць межы, якія Меркель шырока адкрыла ў 2015 годзе. А кепскія навіны ад канцэрна VW прымушаюць нас усумніцца ў нямецкай эканамічнай мадэлі. Але праблемы, з якімі сутыкаецца Нямеччына, – гэта ж і праблемы ўсяго кантынента. Гэта праблемы польскіх межаў, на якіх адчуваецца любая змена міграцыйнай палітыкі Берліна. Гэта праблемы польскіх пастаўшчыкоў і заводаў, якія жывуць за кошт заказаў нямецкіх канцэрнаў. Гэта праблемы польскай ваеннай стратэгіі – у тым выпадку, калі немцы вырашаць скараціць падтрымку Кіева», – падсумоўвае польскае выданне.
«Заходнія чыноўнікі хочуць, каб улады Украіны сфармулявалі рэалістычныя мэты вайны з Расеяй, прынамсі на бліжэйшы год», – піша The Wall Street Journal са спасылкай на крыніцы. Артыкул выдання выйшаў з загалоўкам «Украіну змушаюць задумацца аб плане „Б“ у вайне з Расеяй».
«Краіны Захаду», – адзначае выданне, – «па-ранейшаму падтрымліваюць мэту прэзідэнта Украіны Уладзіміра Зяленскага – выцесніць войскі РФ з усёй тэрыторыі краіны. Але на фоне павольнага прасоўвання расейскіх сіл на фронце і паслаблення грамадскай падтрымкі Украіны ў заходніх краінах некаторыя еўрапейскія дыпламаты лічаць, што Кіеў павінен сфармуляваць больш рэалістычныя мэты ў гэтай вайне. Гэта можа дапамагчы заходнім чыноўнікам растлумачыць сваім выбаршчыкам, чаму трэба працягваць аказваць дапамогу Украіне». The Wall Street Journal зазначае, што за апошнія два тыдні ў Кіеве пабывалі некалькі высокапастаўленых амерыканскіх і еўрапейскіх чыноўнікаў. «11 верасня ва Украіну прыехалі дзяржсакратар ЗША Энтані Блінкен і кіраўнік МЗС Вялікабрытаніі Дэвід Лэмі. Пасля візіту высокапастаўленыя чыноўнікі даложаць аб выніках прэзідэнту ЗША Джо Байдэну і прэм’ер-міністру Вялікабрытаніі Кіру Стармеру, якія 13 верасня збіраюцца абмеркаваць падтрымку Украіны. Па словах высокапастаўленых еўрапейскіх чыноўнікаў, украінскім лідарам паведамілі, што для поўнай перамогі Кіева спатрэбіцца заходняя дапамога на “сотні мільярдаў даляраў”. Але ў рэальнасці ні ЗША, ні Еўропа не могуць яе забяспечыць», – падсумоўвае амерыканскае выданне.
Адбыліся тэледэбаты кандыдатаў у прэзідэнты ЗША Камалы Харыс і Дональда Трампа. Дуэль атрымалася гарачай: абодва прэтэндэнты абвінавачвалі адзін аднаго ў пагаршэнні эканамічнай сітуацыі ў краіне і няздольнасці знайсці вырашэнне праблемы. «Харыс рабіла ўпор на эканамічныя і знешнепалітычныя аспекты, а Трамп педаляваў» тэму іміграцыйнай палітыкі. У тым, што тычыцца планаў на будучыню, Харыс была пераканаўчай, а вось адносна сваіх заслуг на сённяшні дзень – зусім не», – такі каментар дае амстэрдамская De Telegraaf.
«У змястоўным плане Харыс трымалася добра. Прагучаўшыя найперш сумневы апынуліся беспадстаўнымі, нават калі Харыс і не атрымалася пераканаўча абгрунтаваць усе тыя развароты, якія яна сабе дазваляла па розных пытаннях. Прадстаўніца дэмакратаў выразна выклала свае планы, сярод якіх – зніжэнне падаткаў для найнізкіх катэгорый даходаў, а таксама меры ў галіне жыллёвага рынку. Яна таксама некалькі дыстанцыявалася ад дзейнага прэзідэнта Байдэна і пазіцыянавала сябе як правадырку “новага пакалення”. Аднак на адно пытанне адказу ў яе не знайшлося: калі яе планы такія важныя і значныя, то чаму ж яна не рэалізуе іх прама цяпер – на пасадзе віцэ-прэзідэнта?», – піша нідэрландскае выданне.
Агляд сусветнай прэсы падрыхтавала Вольга Сямашка
