Лукашэнка гатовы пабудаваць другую АЭС, каб забяспечваць электраэнергіяй акупаваныя рэгіёны Украіны. Калі ж будзе мір? Гандлёвы канфлікт з ЗША: пагроза новых пошлін.
“Лукашэнка гатовы пабудаваць другую АЭС, каб забяспечваць электраэнергіяй акупаваныя рэгіёны Украіны”, – перадае DW.
“З такой прапановай палітык выступіў у расейскім Савеце Федэрацыі 14 сакавіка. Паводле яго слоў, напярэдадні гэта тэма абмяркоўвалася падчас перагавораў з Уладзімірам Пуціным. Аляксандр Лукашэнка лічыць неабходным пабудаваць другую АЭС на ўсходзе Беларусі, каб забяспечваць электраэнергіяй Бранскую вобласць і акупаваныя Расеяй тэрыторыі Украіны. “Мы папрасілі расейцаў: калі ёсць магчымасць пабудаваць другую электрастанцыю, мы яе пабудуем самі за выключэннем вось гэтых адказных рэчаў – рэактар, турбіна”, – заявіў ён. Раней Лукашэнка неаднаразова выказваў ідэю будаўніцтва другой АЭС у Беларусі. Пры гэтым, паводле звестак МАГАТЭ, першая беларуская АЭС у Астраўцы, пабудаваная Расатамам, прастойвала каля 50% часу ў першыя гады пасля ўвядзення ў эксплуатацыю», – падкрэслівае DW.
«Пасля сваркі Зяленскага і Трампа ў Белым доме прагрэсам была б і проста сумесная заява Кіева і Вашынгтона, але дэлегацыі дзвюх краін дамовіліся па сутнасці», – адзначае The Washington Post.
«Украіна вылучыла план, які б узаемна спыніў толькі паветраныя і марскія атакі вялікай далёкасці. Але дзяржсакратар ЗША Марка Рубіё даў зразумець, што Дональд Трамп хоча поўнага спынення баявых дзеянняў, у тым ліку на перадавой, дзе гіне больш за ўсё людзей. Маскве зараз давядзецца або прыняць здзелку, якую ў іншых абставінах яна адпрэчыла б адразу, або наклікаць на сябе гнеў ЗША. Заключаныя ў 2014-м і 2015-м Менскія пагадненні аказаліся сарванымі, і пасля гэтага Масква вылучыла свае доўгатэрміновыя патрабаванні: неўступленне Украіны ў НАТА, правядзенне там прэзідэнцкіх выбараў, захаванне за сабой тэрыторый. Крэмль таксама рэзка супраць таго, каб ва Украіне з’яўляліся еўрапейскія міратворцы. Не выключана, што Крэмль не цалкам абвергне 30-дзённае перамір’е, а прапануе яго перагледзець. Так, напрыклад, каб яно не закранула захопленых ВСУ частак Курскай вобласці. Крыніцы ў заходняй разведцы і зусім паведамляюць, што Масква наўмысна выстаўляе непрымальныя для Кіева і Еўропы патрабаванні, каб працягваць барацьбу. 11 сакавіка ў Парыжы адбылася яшчэ адна закрытая і, магчыма, беспрэцэдэнтная сустрэча. Камандуючыя армій 34-х краін, у тым ліку з ЕЗ і НАТА, але без амерыканскіх калег абмеркавалі канфлікт ва Украіне, імкнучыся ўзяць на сябе больш адказнасці за яго ўрэгуляванне. Па словах афіцыйных асоб, удзел такіх краін, як Японія і Аўстралія, паказала, што традыцыйныя саюзнікі Вашынгтона глыбока занепакоеныя непрадказальнасцю Белага дома», – папярэджвае амерыканскае выданне.
Еўракамісія не стала марудзіць з адказам на ўвядзенне Злучанымі Штатамі 25-працэнтных мытных пошлін на сталь і алюміній з Еўропы: з красавіка Брусель мае намер увесці пошліны на імпарт са ЗША ў памеры 26 мільярдаў еўра. На першым этапе плануецца абкласці пошлінамі такія стандартныя тавары амерыканскай вытворчасці, як віскі гатунку бурбон, джынсы, матацыклы, катары і арахісавае масла. Прэзідэнт ЗША Трамп, у сваю чаргу, на такую заяву прыгразіў абкласці пошлінамі да 200 працэнтаў яшчэ і віна, а таксама іншыя алкагольныя напоі з ЕЗ. Брусэльская De Morgen знаходзіць паралелі з эпохай Вялікай дэпрэсіі 1930-х гадоў, а таксама – шанец пазбегнуць падобнага сцэнара.
“Гісторыя не абавязкова павінна паўтарацца. Калі катастрафічныя наступствы палітыкі Трамп стануць відавочнымі, і перш за ўсё – на банкаўскіх рахунках яго ўплывовых спонсараў, то ціск з патрабаваннем карэкціроўкі такой палітыкі будзе нарастаць. Галоўнай апазіцыяй адміністрацыі Трамп стане эканамічная рэальнасць. Аднак да гэтага сітуацыя павінна ў значнай ступені пагоршыцца і сур’ёзна стукнуць па кішэні прадстаўнікоў самых розных слаёў насельніцтва. У тым ліку і ў Еўропе! Аднак ёсць і асцярожная надзея: на гэты раз нашыя палітычныя лідары відавочна на чэку – і, спадзяёмся, яны стануць дзейнічаць своечасова», – піша бельгійскае выданне.
Пасля перамогі Дональда Трампа на выбарах на Уол-стрыт спачатку панавала эйфарыя, аднак зараз курсы акцый рэзка ўпалі: з сярэдзіны лютага капіталізацыя кампаній, якія ўваходзяць у фондавы індэкс S&P 500, асела на чатыры мільярды даляраў. Прэса дзеліцца сваімі меркаваннямі аб тым, што ж нанесла такі ўдар па эканоміцы ЗША, у якой дамінуе бігтэх. «Палітыка Трампа прыйшлася на вельмі няпросты перыяд для амерыканскай эканомікі», – на гэта зважае швейцарская Corriere del Ticino.
«Прычынай падзення курсу акцый амерыканскіх кампаній стала дзівацкая мытная вайна і планы Ілона Маска па скарачэнні супрацоўнікаў дзяржаўных службаў. Аднак гэтыя фактары не ў стане завуаляваць таго, што перакосы, якія зрабілі магчымым незвычайна высокі рост у апошнія гады, у вышэйшай ступені завастрыліся. Велізарны дэфіцыт бюджэту, які перавышае планку ў 120 адсоткаў ВУП, які ўзмацняецца гандлёвы дэфіцыт і, нарэшце, велізарная фінансавая бурбалка, створаная спекулянтамі на рынку акцый кампаній са сферы новых тэхналогій і першым чынам – штучнага інтэлекту», – адзначае швейцарскае выданне.
Вольга Сямашка, Беларускае Радыё Рацыя
