Вялікая група мігрантаў пры дапамозе Беларусі спрабавала прарвацца на мяжы з Польшчай. Еўрапарламент ухваліў узмацненне прававых нормаў пра прытулак. Гішпанія: легалізацыя паўмільёна нелегальных мігрантаў пад пытаннем. Падрабязнасці свежых матэрыялаў замежнай прэсы ў аглядзе Вольгі Сямашкі.
Фота: Social media page of Ministerstwo Obrony Narodowej
«Вялікая група нелегальных мігрантаў агрэсіўна спрабавала прабрацца ў Польшчу з Беларусі», – піша літоўскае выданне Delfi.
«Была велізарная група з 450 чалавек, якія агрэсіўнымі метадамі спрабавалі трапіць на тэрыторыю Польшчы. Здаецца, гэта не самастойны працэс. Такая вялікая група з Азіі і Афрыкі не магла сабрацца сама па сабе. Гэта напад, арганізаваны беларускім рэжымам. З літоўскага боку апошнім часам назіраюцца толькі спарадычныя спробы нелегальнага перасячэння беларускай мяжы. Тым часам польска-беларуская мяжа сутыкаюцца ў сярэднім з 250 спробамі незаконнага перасячэння ў дзень. Група спрабавала трапіць у Польшчу ў Белавежскім рэгіёне прыкладна ў 100-150 кіламетрах ад літоўска-беларускай мяжы. Гэты ўчастак мяжы яшчэ будуецца. Таму нелегальныя мігранты спрабавалі прарвацца праз агароджу з калючага дроту, фізічнай перашкоды пакуль няма. Дзякуючы намаганням польскай памежнай службы і польскага войска групу нелегальных мігрантаў удалося адбіць. Яны кідалі ў афіцэраў камяні і іншыя прадметы, а таксама былі ўзброеныя самаробнымі прыладамі з цвікамі, якімі пагражалі вайскоўцам. Польскія ўзброеныя сілы дапамагаюць памежнікам ахоўваць мяжу. Калі ўзнікне неабходнасць, Літва таксама можа накіраваць вайскоўцаў да сваёй беларускай мяжы», – падкрэслівае літоўскае выданне.
***
Еўрапарламент адобрыў рэформу заканадаўства ў галіне прадастаўлення прыстанішча, якая абмяркоўвалася ўжо на працягу многіх гадоў. У мінулую сераду з невялікай перавагай галасоў былі прынятыя ўсе дзесяць новых заканадаўчых нормаў, паводле якіх мяркуецца паскорыць працэдуры рэадмісіі і дэпартацыі, павысіць бяспеку на межах, а таксама аблегчыць цяжар краін на знешніх межах ЕЗ за кошт пераразмеркавання мігрантаў. Цяпер засталося дачакацца адабрэння з боку Савета ЕЗ, якое лічыцца ўжо справай вырашанай. «Шанец на новае разуменне міграцыі быў выпушчаны», – наракае турынская газета La Stampa.
«Цяперашні пакт адлюстроўвае падыход, які працягвае разглядаць міграцыю як выключэнне, як надзвычайную сітуацыю, а не прызнае яе структурнай з’явай нашага часу. Перавага пры гэтым аддаецца не рэгуляванню гэтай з’явы, а замятанні яе пад дыван – быццам гэта пыл і смецце. Рэформа еўрапейскай прававой базы ў пытанні міграцыі магла б стаць выдатным шанцам, але ён быў не проста ўпушчаны – замест гэтага была створана аснова для легітымізацыі парушэнняў, якія працягваюцца на знешніх межах Еўразвяза. Дзяржавы ЕЗ атрымалі магчымасць дзейнічаць надалей яшчэ больш жорстка – у парушэнне правоў чалавека», – канстатуе італьянскае выданне.
***
У Гішпаніі плануецца легалізаваць 500000 мігрантаў, якія знаходзяцца ў краіне без належных дакументаў. За адпаведную ініцыятыву ў аўторак прагаласавала пераважная большасць дэпутатаў ніжняй палаты парламента. Калі сваю згоду дасць і Сенат, то мігранты, якія ўехалі ў краіну да 1 лістапада 2021 года, атрымаюць дазвол на знаходжанне і працу ў краіне, а таксама права на атрыманне сацыяльных ільгот і выплат. Аглядальнікі аддаюць належнае ініцыятыве заканадаўцаў, якія сумесна адважыліся на гэты крок, нягледзячы на рознагалоссі па іншых пытаннях. Мадрыдская газета El Mundo рэагуе са змяшанымі пачуццямі.
«З аднаго боку, гэтае рашэнне можна толькі вітаць – як з прычыны палітычнага кансэнсусу, так і з прычыны таго, што ініцыятыва прыйшла знізу – у тым ліку з боку царквы. Гаворка ідзе пра сацыяльную справядлівасць, а міграцыйныя плыні – гэта ключ да эканамічнага поспеху. З іншага боку, масавая легалізацыя з цяжкасцю ўпісваецца ў рамкі палітыкі Еўразвяза, і гэта асабліва далікатнае пытанне на фоне таго, што Гішпанія размешчана на паўднёвай мяжы супольнасці. Учора Еўрапейскі парламент ухваліў новы міграцыйны пакт , супраць якога выступаюць сотні НДА. Сутнасць гэтага пакта зводзіцца да ўзмацнення жорсткасці крытэрыяў для прыёму мігрантаў – такім чынам ЕЗ спрабуе скараціць маштабы нелегальнай міграцыі на кантынент», – піша гішпанскае выданне.
***
Вырашана канчаткова і беззваротна: у Балгарыі адбудуцца чарговыя – шостыя па ліку за апошнія тры гады! – парламенцкія выбары. Яны пройдуць 9 чэрвеня, адначасова з выбарамі ў Еўрапарламент. Прычынай стаў распад вялікай кааліцыі ў складзе альянсу ГЕРБ-СДС (кансерватары) і блока ПП-ДБ (праеўрапейскія лібералы). Да фармавання новага кабінета кіраваць краінай будзе часовы ўрад на чале з Дзімітрам Галоўчавым (ГЕРБ). Deutsche Welle дае наступны каментар.
«Пытанне ў тым, ці не ператворыцца стомленасць выбаршчыкаў, якая назапасілася падчас чарговага палітычнага крызісу на фоне правалу ратацыі, у агіду, і ці не адмовіцца большасць з іх увогуле ісці на выбарчыя ўчасткі 9 чэрвеня. Ці ж выбаршчыкі, наадварот, раззлуюцца – і больш актыўна выйдуць галасаваць? Бо асноўны далягляд – зусім не нейкая новая ‘будучыня’ – хай нават ілюзорная, а ўжо даўно мінулае. Наперадзе выбар паміж тым, што было да ўчорашняга дня, але зламалося і патрабуе папраўкі, і тым, што было адхілена, але сёння ўжо не ўяўляецца гэтак ужо непрымальным», – адзначае нямецкае выданне.
Беларускае Радыё Рацыя
