Што засталося за кадрам звальнення Агнешкі Рамашэўскай з «Белсату». Рэзалюцыя Рады Бяспекі ААН па Сектары Газа. Расея пасля тэракту: катаванні і гвалт. Падрабязнасці свежых матэрыялаў замежнай прэсы ў аглядзе Вольгі Сямашкі.
Паводле звестак польскага выдання Onet, за абмежаваннем фінансавання беларускіх СМІ стаіць Вашынгтон-пасярэднік. Менавіта ён павінен быў з боку Кіева аказаць ціск на Варшаву ў гэтым пытанні. Пры гэтым Украіна вядзе вельмі складаную гульню з Аляксандрам Лукашэнкам.
«Першыя звесткі пра абмежаванне фінансавання беларускіх апазіцыйных СМІ пачалі паступаць у Onet з амерыканскіх крыніц некалькі тыдняў таму. На іх думку, амэрыканская дыпламатыя мела націснуць на Польшчу, каб тая таксама зменшыла грашовую плынь у незалежныя апазіцыйныя беларускія СМІ. Абмежаванне фінансавання, на жаль, таксама часткова апраўдана. Значная частка беларускіх СМІ была, на думку амерыканскіх выкрывальнікаў, абсалютна неэфектыўнай. Гэтыя СМІ страцілі свае крыніцы інфармацыі ў Беларусі і ўсё больш арыентаваліся на перадрук інфармацыі адзін аднаго. Безумоўна, такая дзейнасць не магла аказаць рэальнага ўплыву на рэчаіснасць у Беларусі. Таму спатрэбіліся некаторыя змены. Але нават у такім выпадку, у Польшчы рэдка ўспамінаюць, што Кіеў вядзе з Лукашэнкам складаную гульню. З аднаго боку, змагаецца з ім і трымае на сваёй тэрыторыі беларускія аддзелы, якія ўдзельнічаюць у баях супраць расейцаў. З іншага боку, вядзе асцярожны і стрыманы дыялог з рэжымам у Менску. З кіеўскага боку гэты дыялог будзе весці правая рука прэзідэнта Уладзіміра Зяленскага Андрэй Ермак, з беларускага — кіраўнік КДБ генерал Іван Церцель, таксама паляк.
Кіеў відавочна супраціўляўся ціску з Варшавы падчас кіравання ПіС, мэтай якога была арганізацыя сустрэчы Зяленскага з лідарам беларускай апазіцыі Святланай Ціханоўскай. Паводле звестак Onet, за ціскам на Кіеў у гэтым пытанні стаяла акурат Агнешка Рамашэўская», – канстатуе польскае выданне.
***
Савет Бяспекі ААН чатырнаццаццю галасамі «за» – ЗША ўстрымаліся – прыняў рэзалюцыю, якая патрабуе “неадкладнага спынення агню” ў сектары Газа . Дакумент заклікае як да перамір’я на час ісламскага месяца Рамадан, які працягнецца да 9 красавіка, так і да вызвалення закладнікаў, захопленых радыкальнай ісламісцкай групоўкай ХАМАС. Еўрапейскія СМІ разыходзяцца на думцы аб магчымых наступствах прыняцця рэзалюцыі. На думку турынскай газета La Stampa, Нетаньяху апынуўся ў сітуацыі цугцванга.
«Дзеянні з боку ААН у камбінацыі з разглядам у Гаазе аказваюць сур’ёзны ціск на ізраільскія ўзброеныя сілы. Працягваць аперацыі як ні ў чым не бывала – не кажучы ўжо пра штурм горада Рафах, які ператварыўся ў велізарны лагер бежанцаў, – азначала б падвергнуць сябе далейшым абвінавачванням у парушэнні міжнароднага права. Рэзкая рэакцыя прэм’ер-міністра Ізраіля з’яўляецца прыкметай таго, што Джо Байдэн закрануў яго за жывое», – піша італьянскае выданне.
***
Уладзімір Пуцін заявіў пра тое, што тэракт у Маскве, які забраў жыцці больш за 130 чалавек, ажыццёўлены ісламісцкімі тэрарыстамі. Пры гэтым ён, аднак, не стаў адмаўляцца ад абвінавачанняў у адрас Украіны, заявіўшы, што заказчыкаў тэракту яшчэ трэба будзе выявіць. Арыштавана ўжо сем падазраваных. У залю пасяджэнняў чацвёра з іх былі дастаўлены ўжо са слядамі катаванняў. «Паказаць падазраваных са слядамі катаванняў – гэта мэтанакіраваны крок», – наракае Neue Zürcher Zeitung.
«Сілавікі наўмысна абнародавалі кадры з жорсткімі катаваннямі: аднаму з затрыманых наносілі ўдары токам, далучыўшы правады да геніталій. Апошні затрыманы быў дастаўлены ў залу суда проста з аддзялення неадкладнай дапамогі. Ён раз-пораз губляе прытомнасць, але пры гэтым дае прызнальныя паказанні, як і астатнія. Выстаўленне ўсяго гэтага напаказ нагадвае абрад выгнання д’ябла. Расейскія сілавікі не здолелі ні прадухіліць тэракт, ні спыніць дзеянні злачынцаў. А таму Пуцін, які валодае краінай на працягу чвэрці стагоддзя, зараз мае намер прадэманстраваць сілу», – падкрэслівае швейцарскае выданне.
***
У першым туры прэзідэнцкіх выбараў у Славакіі перамогу нечакана атрымаў беспартыйны кандыдат і былы міністр замежных спраў Іван Корчак, які набраў 42,5 працэнта галасоў. Яго галоўным канкурэнтам выступае спікер парламента Петэр Пелегрыні – кааліцыйны партнёр прэм’ер-міністра Роберта Фіцо, вельмі спрэчнай фігуры на небасхіле славацкай палітыкі. Будапешцкая Népszava разважае пра адрозненні паміж Венгрыяй і Славакіяй.
«Самы папулярны палітык краіны, Петэр Пелегрыні, відавочна падвергся санкцыям з боку выбаршчыкаў – паколькі з’яўляецца кандыдатам Фіцо, які, у сваю чаргу, ідзе па орбанаўскім шляху. Тысячы грамадзян, якія выйшлі на дэманстрацыю ў падтрымку Корчака ў нядзельны вечар, у чарговы раз далі зразумець, што яны прадухіляць – ці прынамсі маюць намер прадухіліць – дамінаванне ў знешняй палітыцы дуэта Фіцо-Пелегрыні і спыніць, ці як мінімум паспрабаваць спыніць спробу ўладаў пад свой кантроль узяць сродкі масавай інфармацыі. Часам няма нічога ганебнага ў тым, каб павучыцца чаму-небудзь слушнаму ў суседа. А вось нам павінна быць сорамна, бо Венгрыя ніколі не пратэставала супраць агрэсіўнай знешняй палітыкі і антыеўрапейскай пазіцыі ўласнага ўрада», – піша венгерскае выданне.
Беларускае Радыё Рацыя
