Кіраўнік украінскай выведкі папярэджвае Польшчу – «Ты будзеш наступнай». Украіна: у РБ ААН ЗША прагаласавалі разам з Расеяй. Макрон у гасцях у Трампа. Падрабязнасці свежых матэрыялаў замежнай прэсы.
“Наступнай будзе Польшча. Я вам гэта прама кажу. Не трэба баяцца, гэта трэба ўсведамляць”, – цытуе кіраўніка ваеннай выведкі Украіны Кірыла Буданава Interia. Генерал акрэсліў сцэнар, паводле якога Расея спачатку паглынае Беларусь і Украіну, а потым наступае далей на захад.
“Паводле Буданава, Расея стварае імперыю, якая павінна ахапіць краіны былога Варшаўскага дагавора. Пра гэта падчас канферэнцыі «Ялцінская еўрапейская стратэгія» ў Кіеве заявіў кіраўнік Галоўнага ўпраўлення разведкі Мінабароны Украіны. “Калі адбудзецца найгоршы сцэнар і тры краіны Расея, Беларусь і Украіна стануць адной, што малаверагодна, то наступнай будзе Польшча. Далей будуць Чэхія, Венгрыя, Балгарыя. Усе адступяць. Краіны Варшаўскай дамовы – гэта мінімум, калі вы будуеце імперыю. Падчас канферэнцыі Буданаў таксама распавёў пра цяперашнія ваенныя мэты Расеі. Паводле ўкраінскай выведкі, Крэмль цэліць далей і не спыніцца на поўнай акупацыі Данбасу, Хэрсонскай, Запарожскай абласцей і Крыму. На яго думку, канчатковай мэтай Масквы застаецца поўны кантроль над Украінай. Расея лічыць сябе імперыяй, а не федэрацыяй, і ядром імперыі з’яўляюцца Расея, Беларусь і Украіна. Генерал сцвярджае, што расейцы плануюць выкарыстаць перапынак у баявых дзеяннях не толькі для аднаўлення сілаў, але і для аналізу дапушчаных памылак і спробаў дэстабілізаваць унутраную сiтуацыю ва Украіне. — І тады ў іх з’явіцца «новае акно магчымасцяў» для дасягнення сваёй стратэгічнай мэты”, – прыводзіць словы ўкраінскага выведчыка польскае выданне.
У трэція ўгодкі расейскага поўнамаштабнага нападу на Украіну, учыненага ў парушэнне ўсіх нормаў міжнароднага права, ЗША сумесна з Расеяй, Кітаем і іншымі дзяржавамі прынялі ў Радзе Бяспекі ААН рэзалюцыю, у якой гаворыцца пра неабходнасць найхутчэйшага спынення вайны, але ні словам не згадваецца пра тое, што агрэсарам выступіла Масква. Еўрапейцы падчас галасаванняў у Радзе Бяспекі ўстрымаліся. А вось Генеральная асамблея ААН большасцю галасоў прыняла рэзалюцыю, якая асуджае напад. «Перад Еўразвязам цяпер вельмі вялікія выклікі», – падкрэслівае Нікасійская Cyprus Mail.
«Здавалася, ніводны з бакоў не зможа ў агляднай будучыні выйграць гэтую вайну, і тут прэзідэнт Трамп выступіў са сваёй перакручанай ініцыятывай аб заканчэнні вайны – і адкрыта выказаўся за тое, каб узнагародзіць агрэсара і пакараць ахвяру. Ці змогуць еўрапейскія дзяржавы прапанаваць Украіне тую падтрымку, якая ёй неабходна, для таго каб працягваць барацьбу супраць Расеі, бо любая дамова аб міры, якую Трамп прапанаваў бы Кіеву, была б капітуляцыяй перад Пуціным? Наступныя месяцы стануць вялікім выпрабаваннем для Еўропы і будучыні ўсяго кантынента», – піша кіпрскае выданне.
У панядзелак прэзідэнт Францыі Эманюэль Макрон наведаў свайго амерыканскага калегу Дональда Трампа. На сустрэчы ў Белым доме размова ішла пра становішча спраў у расейска-ўкраінскай вайне. Макрон адправіўся ў Вашынгтон з мэтай адвадзіць Трампа ад яго прарасейскай пазіцыі і забяспечыць Еўропе месца за сталом перамоваў. «Трампа немагчыма прывесці ў прытомнасць», – папярэджвае парыжская Les Echos.
«На фоне “здрады Вашынгтона” ні Парыж, ні Лондан не павінны аддавацца ілюзіі, што іх абяруць у пасярэднікі паміж Еўропай і Злучанымі Штатамі – на гэта не варта разлічваць ні прэм’ер-міністру Вялікабрытаніі, нягледзячы на ”асаблівыя” адносіны паміж Лонданам і Вашынгтонам, ні Эманюэлю Макрону. Гаворка не пра тое, каб завабіць Трампа, спадзеючыся прывесці яго ў цвярозы розум. Гаворка ідзе пра тое, каб яму супрацьстаяць – у імя абароны нашых інтарэсаў і вернасці нашым каштоўнасцям. Здаць Украіну азначае здрадзіць саму нашу сутнасць. А яшчэ гэта будзе гарантыяй таго, што пасля ганьбы нас дагоніць вайна», – піша французскае выданне.
Пасля перамогі на выбарах у бундэстаг кандыдат на пасаду канцлера ад ХДС/ХСС Фрыдрых Мерц мае намер у кароткія тэрміны правесці з СДПГ перамовы аб фармаванні ўрадавай кааліцыі. Еўрапейская прэса разважае пра тое, чаго чакаць ад будучага канцлера ФРГ Мерца. А вось турынская La Stampa аглядаецца на папярэднюю кар’еру будучыні канцлера.
«У адрозненне ад свайго палітычнага ментара Вольфганга Шойбле, Мерц заўсёды аддаваў перавагу адступіць на крок назад, чым зламаючы галаву несціся наперад. У залежнасці ад выніку гэта можна разглядаць як прыкмету розуму ці ж наадварот – як сведчанне недастатковай упартасці. Акрамя таго, яго шматгадовая блізкасць да фінансавых колаў таксама справядліва выклікае пытанні. Ці падыдзе ён да рашэння крызісу ў аўтапраме ў духу якога-небудзь хедж-фонду – ці ж стане сачыць за тым, каб свет фінансаў не занадта аддаляўся ад рэальнай эканомікі? Ці будзе ён у стане выступаць у ролі мадэратара і складаць кампрамісы, ці ж, наадварот, – стане правакаваць раскол і зноўку змяшае карты?», – задаецца пытаннем італьянскае выданне.
Агляд сусветнай прэсы падрыхтавала Вольга Сямашка
Фото: Chip Somodevilla / Getty Images
