- Як Крэмль праз Беларусь рыхтуецца да старшынства Польшчы ў ЕЗ
- Польшча на чале Рады ЕЗ: якім будзе курс?
- Пашкоджанне кабеляў у Балтыйскім моры: танкеры-дыверсанты
“У той час як Польшча рыхтуецца ўзяць на сябе старшынства ў Савеце ЕЗ 1 студзеня 2025 года, яна працягвае сутыкацца з інтэнсіўнымі дэзінфармацыйнымі атакамі з боку расейскіх чыноўнікаў вышэйшага ўзроўню і пракрамлёўскіх СМІ”, – сочыць за сітуацыяй міжнароднае выданне Stopfake.
“Значную частку расейскай дэзінфармацыі можна абагульніць трыма апавяданнямі. Па-першае, Польшча — гэта агрэсіўная марыянетка Захаду. Па-другое, у яе моцныя імперыялістычныя амбіцыі адносна Украіны і Беларусі. Па-трэцяе, яна не хоча нічога, акрамя вайны. Калі верыць Крамлю, то Польшча марыць пра сваё імперскае мінулае і хоча адбудаваць сваю старую імперыю на амерыканскія грошы і ўкраінскую кроў. Варшава рухаецца да адраджэння Вялікай Польшчы і выкарыстоўвае расейскую ваенную аперацыю як магчымасць забяспечыць вяртанне сваіх Усходніх Крэсаў. Маўляў, польскія войскі рухаюцца на ўсход, каб анексаваць Заходнюю Украіну і частку Беларусі.
У той час як Крэмль узмацніў сваё ўласнае бразганне ядзернай зброяй, пракрамлёўскія гандляры дэзінфармацыяй таксама спрабавалі адвесці сваю ўласную ядзерную рыторыку на Польшчу, ілжыва сцвярджаючы, што Варшава хоча мець амерыканскую ядзерную зброю, каб ажыццявіць будучы падзел Украіны”, – канстатуе міжнароднае выданне.
Польшча пераняла старшынства ў Радзе ЕЗ пад лозунгам «Бяспека, Еўропа!». На працягу наступных шасці месяцаў Варшава будзе праводзіць пасяджэнні і кіраваць органам, у якім урады краін ЕЗ сумесна прымаюць або рыхтуюць рашэнні. Еўрапейская прэса актыўна абмяркоўвае старшынства Польшчы яшчэ і ў кантэксце параўнання з яе папярэднікам Венгрыяй, якая, знаходзячыся на гэтай пасадзе, набыла нямала крытыкі. Пражская Hospodářské noviny з аптымізмам пазірае на далейшае старшынства.
«Туск – дасведчаны еўрапейскі баец. Ён на працягу пяці гадоў быў старшынёй Еўрапейскай рады і тры гады ўзначальваў найбуйнейшую палітычную сілу ў ЕЗ – Еўрапейскую народную партыю. Польшча становіцца вядучай дзяржавай Еўрасаюза. Тым больш што пазіцыі прэзідэнта Францыі Эманюэля Макрона аслаблі з-за ўнутрыпалітычных праблем. Акрамя таго, можна чакаць, што пасля датэрміновых выбараў Германія як мінімум да лета затрымаецца ў кааліцыйных перамовах», – піша чэшскае выданне.
У Каляды ў Балтыйскім моры быў пашкоджаны падводны электрычны кабель EstLink 2, які злучае Фінляндыю і Эстонію, а таксама і іншыя кабелі. Фінская берагавая служба затрымала расейскі нафтавы танкер Eagle S – у яго быў адарваны якар; у адносінах да сямі членаў экіпажа пачата расследаванне. Еўрапейскія аглядальнікі паказваюць на тое, што “ценявы флот” Масквы – гэта яшчэ адзін сродак расейскай гібрыднай вайны, і патрабуюць ад Еўропы жорсткіх мер у адказ. «Расейская пагроза нікуды не падзенецца нават у тым выпадку, калі вайна ва Украіне спыніцца», – перасцерагае дзюсельдорфская Handelsblatt.
«Пуцін не пакіне сваіх метадаў запалохвання і спроб дэстабілізацыі – нават калі Захад выканае яго ўмовы, як таго патрабуюць самапрызначаныя прыхільнікі свету. Наадварот! Удары, дыверсіі, хакерскія напады і кампаніі па дэзінфармацыі навочна паказваюць, што з сябе ўяўляе Пуцін. І перамір’е з Украінай не спыніць яго ад спробаў дэстабілізаваць заходнія дэмакратыі. Пакуль Пуцін знаходзіцца ва ўладзе, нам давядзецца паступова прывыкаць да таго, што і ў Нямеччыне не будзе абсалютнай бяспекі», – адзначае нямецкае выданне.
З 1 студзеня 2025 года па ўкраінскай газатранспартнай сетцы ў Еўропу больш не паступае расейскі газ. Кіеў адмовіўся працягваць дамову аб транзіце, пакуль Масква не спыніць вайну супраць Украіны. Аб’ём газу, які перапампоўваўся па трубаправодах праз украінскую тэрыторыю, і так ужо быў невялікі, зараз жа ў Газпрома застаецца толькі трубаправод, які ідзе праз Турцыю. Па ім блакітнае паліва ўсё яшчэ паступае, напрыклад, у Венгрыю. «Гэта стала сур’ёзным фінансавым ударам па Крамлі», – падсумоўвае ў сваёй артыкуле на партале Эспрэса эксперт у галіне энергетыкі Міхайла Ганчар.
«Кіеў выстаяў пад націскам траянскіх коней Крамля ў ЕЗ, не паддаўся на карупцыягенныя прапановы „азербайджанскага“ ці якога-небудзь іншага газу, і ў канчатковым выніку вымусіў Маскву спыніць экспарт газу ў Еўропу транзітам праз Украіну. Дзякуючы гэтаму агрэсар пазбавіцца каля 6-6,5 мільярдаў долараў ЗША гадавога даходу ад экспарту газу, які з’яўляецца яшчэ адным каналам фінансавання вайны», – падкрэслівае ўкраінскае выданне.
Вольга Сямашка, Беларускае Радыё Рацыя
