Змова ўльтраправых НАТА адносна ўкраінскай зямлі «менавіта тое, чаго хоча Пуцін». Суд ААН Ізраілю: вайна, але толькі без парушэнняў правоў. Другі тур прэзідэнцкіх выбараў у Фінляндыі. Падрабязнасці свежых матэрыялаў замежнай прэсы.
На фота Пека Хаавіста і Аляксандр Стуб
Інстытут сацыяльнага страхавання (ZUS) у Польшчы апублікаваў новыя дадзеныя, якія паказваюць істотныя змены ў дэмаграфічным складзе замежных працоўных у краіне. «У 2023 годзе найбольш прыкметнае зніжэнне было адзначана сярод грамадзян Расеі і Грузіі, што было чакана з-за вайны ва Украіне, якая працягваецца. Аднак, насуперак чаканням, найбольшы прырост замежных працоўных склалі не ўкраінцы, а беларусы», – піша еўрапейскае выданне Remix Offers News.
«На канец 2023 года агульная колькасць зарэгістраваных замежных грамадзян у Польшчы дасягнула 1 127 744 чалавекі. За год іх колькасць павялічылася на 64 483 чалавекі, або на 6,1 працэнта. Аднак дынаміка росту істотна адрознівалася ў залежнасці ад краіны паходжання. Прыкметным паваротам з’яўляецца тое, што ў мінулым годзе больш за ўсё павялічылася колькасць беларусаў, а не ўкраінцаў. Беларускі кантынгент павялічыўся на 21,3 тысяч чалавек, павялічыўшыся амаль на 20 працэнтаў, абагнаўшы 13,4 тысяч грамадзян Украіны, якія занялі другое месца. У адваротным выпадку галоўныя краіны паходжання гэтых работнікаў – гэта пераважна азіяты. Індыя заняла трэцяе месца з ростам на 4588; Калумбія, якая прадстаўляе Паўднёвую Амерыку, дадала 3535 чалавек; і Непал унёс 3481. На Філіпінах, пераважна каталіцкай краіне, у 2023 годзе было зарэгістравана 2870 грамадзян. Узбекістан і Турцыя, цюркскія краіны, занялі сёмае і восьмае месцы з 2026 і 1784 новымі рэгістрацыямі адпаведна. Іншыя азіяцкія краіны таксама былі прыкметныя. Колькасць грамадзян Бангладэш павялічылася на 1770 чалавек, а інданезійцаў — на 1759 чалавек. Працягнулі спіс азербайджанцы (+1077), в’етнамцы (+1057), туркмены (+1038), казахі (+782), кіргізы (+549), аргентынцы (+360). Што тычыцца змяншэння колькасці, найбольшае змяншэнне зафіксавана ў грузін — іх зарэгістравана на 1166 менш. Расейцы ідуць за імі са зніжэннем на 1017. Таксама прыкметна скарацілася колькасць грамадзян Славакіі (-195) і Балгарыі (-109)», – канстатуе еўрапейскае выданне.
Міжнародны суд ААН у Гаазе заклікаў Ізраіль узмацніць меры па абароне мірнага насельніцтва сектара Газа. Пры гэтым суд не вынес пастановы аб неадкладным спыненні баявых дзеянняў. Пазоў па абвінавачанні Ізраіля ў здзяйсненні генацыду, пададзены Паўднёва-Афрыканскай Рэспублікай, суд на дадзеным этапе яшчэ не разглядае, аднак ён пацвердзіў, што гэтае пытанне падпадае пад яго юрысдыкцыю. «Пастанова суда – гэта спроба прайсці па лязу нажа», – піша турынская газета La Stampa.
«Палестынцы расчараваныя, што суд не заклікаў да неадкладнага спынення агню. Ізраіль шакіраваны тым, што супраць яго выстаўлена абвінавачанне ў «магчымым генацыдзе» – слова, якое ён ніколі не хацеў бачыць згаданым у сувязі з яўрэйскай дзяржавай. Пастанова суддзяў раззлавала абодва бакі, аднак для ўрада Біньяміна Нетаньяху наступствы, якія вынікаюць з яе, больш сур’ёзныя, і гэта нягледзячы на тое, што рашэнне ўтрымлівае ў сабе дакладнае асуджэнне дзеянняў ХАМАСа і патрабаванне адпусціць закладнікаў. Ці можна сказаць, што кровапраліцце ў Газе сапраўды з’яўляецца генацыдам – гэтае пытанне суд будзе вырашаць значна пазней», – адзначае італьянскае выданне.
Пасля першага тура галасавання, які прайшоў у мінулую нядзелю, з дзевяці кандыдатаў, вылучаных у пераемнікі папулярнаму Саўлі Нііністэ, у другі тур выйшлі двое: экс-прэм’ер-міністр Аляксандр Стуб, які, як і Нііністэ, прадстаўляе кансерватыўную Нацыянальную кааліцыю, і кандыдат «зялёных» поглядаў Пека Хаавіста, які балатуецца ў якасці незалежнага кандыдата. Як падкрэслівае прэса, выбаршчыкі ўжо вызначыліся з двума асноватворнымі напрамкамі. «Абодва кандыдаты прытрымліваюцца жорсткага курса ў дачыненні да небяспекі, якая зыходзіць ад Расеі», – з задавальненнем адзначае Українська правда.
«Імя новага прэзідэнта Фінляндыі, які будзе кіраваць краінай аж да 2030 года, канчаткова стане вядомае ўжо пасля другога тура, які павінен прайсці 11 лютага. Але можна з упэўненасцю сказаць, што хто б ні выйграў у гэтай гонцы, падтрымка Украіны з боку Фінляндыі застанецца нязменна моцнай. Як і голас Фінляндыі ў ЕЗ і НАТА на карысць таго, каб як мага хутчэй узмацніць абараназдольнасць і рыхтавацца да ўсіх сцэнарыяў», – падкрэслівае ўкраінскае выданне.
Пентагон паведаміў пра першыя страты амерыканскай арміі падчас канфлікту на Блізкім Усходзе. 28 студзеня беспілотнік атакаваў ваенную базу на мяжы Іарданіі і Сірыі, тры чалавекі забіты, не менш як 30 паранены. З моманту абвастрэння ў сектары Газа цэнтральнае камандаванне ЗША не прызнавала гібель вайскоўцаў. Адказнасць за атаку ўзяла на сябе шыіцкая групоўка «Ісламскі супраціў», якую падтрымлівае Іран. Пры гэтым у Тэгеране аспрэчылі падазрэнні ў датычнасці да нападу. Тым часам прэзідэнт ЗША Джо Байдэн паабяцаў адказаць на атаку шыіцкай групоўкі. «Цяпер прэзідэнт ЗША павінен вырашыць, як далёка ён гатовы зайсці ў сваёй адплаце», – разважае амерыканская газета The New York Times.
«Нікуды не зніклі рызыкі маштабнай вайны, якой амерыканскія ўлады імкнуцца пазбегнуць. Тым не менш, пакуль незразумела, ці вырашыцца адміністрацыя паражаць мэты ўнутры Ірана, як заклікаюць зрабіць некаторыя рэспубліканцы, якія крытыкуюць Байдэна. Рашэнне ўскладняецца і тым, што ўзмацненне баявых сутыкненняў з Тэгеранам можа затармазіць спыненне агню ў сектары Газа», – канстатуе амерыканскае выданне.
Агляд сусветнай прэсы падрыхтавала Вольга Сямашка
Фота: Lehtikuva
