- Як Беларусь удзельнічае ў злачынствах Расеі?
- Прэзідэнцкія выбары ў Румыніі: ці мелі месца маніпуляцыі?
- Што чакае Францыю пасля падзення ўрада?
Ролю Беларусі ў злачынствах РФ абмеркавалі на слуханнях у Кангрэсе ЗША, а выніка аналізуе DW.
«У якасці аднаго са сведкаў на слуханнях выступіў прадстаўнік арганізацыі былых сілавікоў BelPol Мацвей Купрэйчык. Паводле яго слоў, што ў распараджэнне BelPol аказаўся тэкст дагавора аб гарантыях бяспекі ў рамках Саюзнай дзяржавы: “Гэта пагадненне дазволіць Расeі размясціць новыя ваенныя базы і воінскія кантынгенты на тэрыторыі Беларусі. Акрамя таго, грамадзян Беларусі могуць адпраўляць на вайну з Украінай або абараняць тэрытарыяльную цэласнасць. Расеі”. Кіраўнік літоўскага МЗС Габрыэлюс Ландсбергіс назваў Беларусь “краінай нумар адзін, якая дапамагае Расeі пазбегнуць санкцый”: “Таму вельмі важна ўзгадніць санкцыі, уведзеныя супраць Расеі, з санкцыямі, уведзенымі супраць Беларусі», – цытуе міністра DW.
Румынскія спецслужбы падазраюць, што за нечаканым поспехам ультраправага кандыдата Кэліна Джорджэску ў першым туры прэзідэнцкіх выбараў, які адбыўся два тыдні таму, стаіць Масква. Мяркуецца, што менавіта расейскія сілы прасоўвалі агітацыйную кампанію Джорджэску ў TikTok. Генеральная пракуратура Румыніі пачала расследаванне наконт магчымых маніпуляцый. Поўная блытаніна – і гэта напярэдадні другога тура выбараў у нядзелю! «Ужо даўно даказана, што ў закуліссе арудуе Крэмль», – абураецца рымская La Repubblica.
«Свінцовы цень Масквы навіс над Бухарэстам напярэдадні другога тура няпростых выбараў, які адбудзецца ў нядзелю і ў якім будзе ўдзельнічаць пераможца першага тура – правы экстрэміст і прапуцінскі кандыдат Кэлін Джорджэску. На ім у дадзены момант засяроджана ўвага Злучаных Штатаў, Еўразвяза – і нават румынскай юстыцыі. Яго перадвыбарная кампанія ў сацыяльнай сетцы TikTok выклікала цэлую лавіну падазрэнняў. У першую чаргу было выкрыта актыўнае ўмяшанне з боку Крамля. У мінулую сераду прэзідэнт Румыніі Клаўс Ёханніс даў дабро на абнародаванне вынікаў расследавання Вышэйшай рады па абароне, якія ўтрымоўваюць у сабе доказы замежнага ўмяшання ў выбарчы працэс у карысць Кэліна Джорджеску».
Пасля таго як ураду Францыі быў вынесены вотум недаверу, у краіне пачалі раздавацца заклікі да адстаўкі прэзідэнта. Але Эманюэль Макрон рашуча адпрэчыў іх. У сваім звароце да нацыі ён заявіў, што працягне выконваць прэзідэнцкія абавязкі да афіцыйнага заканчэння свайго тэрміну – у 2027 годзе – і прызначыць новага прэм’ер-міністра, якому будзе даручана сфарміраваць “урад агульнай цікавасці”. Улічваючы суадносіны сіл на палітычнай арэне Францыі, Neue Zürcher Zeitung лічыць, што найлепшым выхадам з сітуацыі стала б стварэнне ўрада беспартыйных тэхнакратаў.
«Гэта значыць такога прэм’ер-міністра і такога кабінета, сябры якога не былі б прывязаныя да якой-небудзь партыі – ці сама меней карысталіся б павагай за яе межамі. Тое, што ўжо не раз было на практыцы рэалізавана ў Італіі, для Францыі стала б эксперыментам. Аднак, мяркуючы па ўсім, гэта было б найлепшым рашэннем. Апошнія месяцы паказалі, што партыі, якія дамінуюць у Нацыянальным сходзе, нават дзеля інтарэсаў краіны не гатовы ўзяць сябе ў рукі і вырашыцца на кампраміс – нават тады, калі гаворка ідзе аб такой прынцыповай і істотнай рэчы, як бюджэт. Урад, які складаецца з экспертаў, на нейкі час мог бы забяспечыць стабільнасць, паколькі ён стаў бы ўвасабленнем кансенсусу – хай ён і будзе невялікі».
Пяць гадоў таму кадры даху сабора Нотр-Дам-дэ-Пары абляцелі ўвесь свет. Прычына пажару не высветлена і да гэтага часу. У гэтыя выходныя парыжская славутасць зноў адчыніць свае дзверы. На цырымонію запрошаны кіраўнікі дзяржаў і ўрадаў многіх краін свету. З прамовай выступіць прэзідэнт Эманюэль Макрон, які знаходзіцца ў няпростай сітуацыі ў сувязі з адстаўкай урада. «Як раз у разгар палітычнай блытаніны будучы прэзідэнт ЗША Дональд Трамп вырашыў наведацца ў Францыю ў гонар адкрыцця Нотр-Дама», – дзеліцца сваімі назіраннямі венская Die Presse.
«Праеўрапейскія цэнтрысцкія партыі паўсюдна марнеюць, няздольныя знайсці адказы на ўздым неанацыяналістаў, якія, у сваю чаргу, з нецярпеннем чакаюць Трампа. Але і іх чакае расчараванне. Магчыма, будучы прэзідэнт ЗША запросіць іх у Мар-а-Лага ці прыабніме на камеру, але ў астатнім яму на іх, падобна, зусім напляваць. Для Трампа Еўропа – гэта рэлікт, які развальваецца, і ён больш не мае намеру прадухіляць яго распад з дапамогай амерыканскіх грошай. Макрон не зможа зрабіць уражанне на амерыканскага магната вечарынкай у Нотр-Даме ў наступную суботу. У вачах Трампа Макрон – гэта проста непапулярны прэзідэнт некіравальнай краіны, якая размешчана на слабым кантыненце».
Беларускае Радыё Рацыя, Вольга Сямашка
